اسلام آباد: پبلک اکاؤنٹس کمیٹی کی ذیلی کمیٹی نے یوٹیلیٹی اسٹورز کے ملازمین کے واجبات سے متعلق سخت احکامات جاری کر دیے ہیں۔ کمیٹی نے وزارتِ صنعت و پیداوار کو ہدایت کی ہے کہ متاثرہ ملازمین کو ان کے تمام واجبات عیدالفطر سے قبل ہر صورت ادا کیے جائیں اور ادائیگیوں کی تفصیلی رپورٹ کمیٹی میں پیش کی جائے۔
تفصیلات کے مطابق ذیلی کمیٹی کا اجلاس کنوینر سید نوید قمر کی صدارت میں ہوا، جس میں یوٹیلیٹی اسٹورز کی بندش اور ملازمین کو درپیش مشکلات پر شدید تشویش کا اظہار کیا گیا۔
اجلاس کے دوران نوید قمر نے یوٹیلیٹی اسٹورز کی اچانک بندش کو ایک غلط فیصلہ قرار دیتے ہوئے کہا کہ اس اقدام نے ہزاروں ملازمین اور ان کے اہلِ خانہ کو شدید معاشی مشکلات میں مبتلا کر دیا ہے۔ ان کا کہنا تھا کہ ملازمین کو ادائیگیوں کے وعدے کیے گئے تھے، مگر تاحال کسی کو ایک روپیہ بھی ادا نہیں کیا گیا۔
کنوینر کمیٹی نے وزارت کے حکام کو مخاطب کرتے ہوئے واضح الفاظ میں کہا کہ غریب ملازمین کو عید کی خوشیوں سے محروم نہیں رکھا جا سکتا، اور موجودہ مہنگائی میں ان کے لیے گھروں کا خرچ چلانا انتہائی مشکل ہو چکا ہے۔
اجلاس میں سیکرٹری فنانس نے کمیٹی کو آگاہ کیا کہ فنانس ڈویژن کی جانب سے واجبات کی ادائیگی کے لیے پہلی قسط کے فنڈز متعلقہ وزارت کو منتقل کر دیے گئے ہیں، تاہم کمیٹی نے اس معاملے پر فوری عملدرآمد پر زور دیا۔
آخر میں کمیٹی نے وزارتِ صنعت و پیداوار کو پابند کیا کہ عیدالفطر سے قبل یوٹیلیٹی اسٹورز کے تمام متاثرہ ملازمین کو ادائیگیاں یقینی بنائی جائیں اور ادائیگیوں کے بعد اس کی جامع اور تحریری رپورٹ کمیٹی میں جمع کرائی جائے۔
