ایران میں سپریم لیڈر کی شہادت کے بعد پیدا ہونے والی آئینی صورتحال کے پیشِ نظر ملک کا نظم و نسق سنبھالنے کے لیے ایک عبوری لیڈرشپ کونسل تشکیل دے دی گئی ہے۔ ایرانی آئین کے آرٹیکل 111 کے تحت قائم کی گئی یہ کونسل نئے سپریم لیڈر کے انتخاب تک ریاستی، انتظامی اور دفاعی معاملات کی نگرانی کرے گی۔
ایرانی میڈیا کے مطابق کونسل میں آیت اللہ علی رضا عارفی کو بطور فقیہ شامل کیا گیا ہے، جو ایرانی صدر مسعود پزشکیان اور عدلیہ کے سربراہ غلام حسین محسنی کے ہمراہ ذمہ داریاں انجام دیں گے۔
رپورٹس کے مطابق عبوری کونسل کا بنیادی مقصد قیادت کے خلا کو پُر کرنا اور حکومتی پالیسیوں میں تسلسل برقرار رکھنا ہے۔ ذرائع کا کہنا ہے کہ یہ کونسل دفاعی اور خارجہ پالیسی سمیت اہم ریاستی فیصلوں کی نگرانی بھی کرے گی، تاہم مستقل سپریم لیڈر کے تقرر کا اختیار 88 رکنی مجلسِ خبرگان کے پاس ہے۔
سیاسی مبصرین کے مطابق مجلسِ خبرگان کے فیصلے تک عبوری انتظام کو ملک میں استحکام برقرار رکھنے کے لیے اہم سمجھا جا رہا ہے۔ ممکنہ امیدواروں کے حوالے سے مختلف نام زیرِ گردش ہیں، تاہم سرکاری سطح پر کسی حتمی امیدوار کا اعلان نہیں کیا گیا۔
علاقائی اور عالمی سطح پر ایران کی داخلی پیش رفت کو قریبی نظر سے دیکھا جا رہا ہے، کیونکہ قیادت میں تبدیلی کے ممکنہ اثرات مشرقِ وسطیٰ کی سیاست پر بھی مرتب ہو سکتے ہیں۔
