امریکا اور اسرائیل نے ایرانی عوام کے دل جلائے، ہم بھی ان کے دل جلائیں گے: علی لاریجانی
تہران (ویب ڈیسک)
ایران کی قومی سلامتی کونسل کے سیکرٹری علی لاریجانی نے امریکا اور اسرائیل کو سخت وارننگ دیتے ہوئے کہا ہے کہ دونوں ممالک نے ایرانی عوام کے دل جلائے ہیں اور اس کا بھرپور جواب دیا جائے گا، “ہم بھی ان کے دل جلائیں گے۔”
اپنے تازہ انٹرویو میں علی لاریجانی کا کہنا تھا کہ حالیہ حملوں نے ایرانی قوم کو شدید دکھ پہنچایا ہے اور دشمن کو اس کے اقدامات کا جواب دیا جائے گا۔ انہوں نے کہا کہ ایران کسی دباؤ میں نہیں آئے گا اور قومی سلامتی پر کوئی سمجھوتہ نہیں کیا جائے گا۔
انہوں نے ایرانی سپریم لیڈر آیت اللہ علی خامنہ ای پر ہونے والے حملے کو انتہائی تکلیف دہ قرار دیتے ہوئے کہا کہ ایک عظیم شخصیت کی شہادت نے پوری قوم کو غمزدہ کر دیا ہے اور اس کے اثرات دور رس ہوں گے۔
علی لاریجانی نے الزام عائد کیا کہ امریکا اور اسرائیل دراصل ایران کو تقسیم اور کمزور کرنے کی سازش کر رہے ہیں، تاہم ایرانی قوم باشعور ہے اور وہ اس مشکل وقت سے نکلنے کی صلاحیت رکھتی ہے۔
انہوں نے مزید کہا کہ دشمن کی کوئی سازش کامیاب نہیں ہوگی اور ایران اپنی خودمختاری اور قومی وقار کے دفاع کے لیے ہر ممکن اقدام کرے گا۔
