کراچی: سابق گورنر سندھ کامران ٹیسوری کا صدرِ مملکت کے نام لکھا گیا باضابطہ استعفیٰ سامنے آ گیا ہے جس میں انہوں نے گورنر سندھ کے طور پر خدمات انجام دینا اپنے لیے ایک بڑا اعزاز قرار دیا ہے۔تفصیلات کے مطابق کامران ٹیسوری نے اپنے عہدے سے استعفیٰ دے دیا تھا اور ذرائع کے مطابق انہوں نے یہ استعفیٰ دوپہر کے وقت صدرِ مملکت کو ارسال کر دیا تھا۔اپنے استعفیٰ میں کامران ٹیسوری نے کہا کہ گورنر سندھ کے طور پر خدمت کا موقع ملنا ان کے لیے باعثِ فخر رہا۔ انہوں نے اپنے دور میں کیے گئے فلاحی اقدامات کا ذکر کرتے ہوئے بتایا کہ گورنر ہاؤس کے تحت تقریباً 50 ہزار بچوں کو آئی ٹی کی تعلیم فراہم کی گئی، جو ایک اہم سنگِ میل ہے۔انہوں نے مزید کہا کہ ان کے دور میں مستحق خاندانوں میں راشن، موٹر سائیکلیں اور لیپ ٹاپ تقسیم کیے گئے جبکہ گورنر ہاؤس کے دروازے عام عوام کے لیے کھولے گئے تاکہ شہریوں کو براہِ راست رسائی حاصل ہو سکے۔کامران ٹیسوری نے حکومت سے اپیل کی کہ ان کے دور میں شروع کیے گئے عوامی فلاح و بہبود کے منصوبوں کو آئندہ بھی جاری رکھا جائے۔انہوں نے اپنے پیغام کے اختتام پر ملک کی ترقی اور خوشحالی کے لیے دعا کرتے ہوئے “پاکستان زندہ باد” کا نعرہ لگایا اور اسی کے ساتھ اپنے استعفیٰ کو مکمل کیا۔
