اسلام آباد: ٹریفک پولیس نے 13 مارچ 2026 بروز جمعہ کے لیے خصوصی ٹریفک ایڈوائزری جاری کرتے ہوئے شہریوں کو غیر ضروری سفر سے گریز اور متبادل راستے اختیار کرنے کی ہدایت کی ہے۔ایڈوائزری کے مطابق ریڈ زون جانے کے لیے صرف مارگلہ روڈ کھلا ہوگا جبکہ دیگر تمام داخلی راستے بند رہیں گے۔ اسی طرح ایران ایونیو آنے اور جانے والے تمام راستے بھی بند رہیں گے۔ٹریفک پولیس کے مطابق چاند تارہ فلائی اوور سے سری نگر ہائی وے تک سرینا چوک بند رہے گا جبکہ آبپارہ سے سہروردی روڈ آنے اور جانے کے لیے مکمل طور پر بند ہوگا۔اسی طرح رجب طیب اردوان فلائی اوور سے جناح ایونیو، کلثوم پلازہ چوک، سیونتھ ایونیو پل اور فضل حق روڈ جیو چوک تک ٹریفک کی آمدورفت معطل رہے گی۔ حاجی کیمپ چوک سے اسلام آباد چوک تک سڑک مکمل بند رہے گی جبکہ آئی جے پی روڈ گندم گودام سے فقیر ایپی روڈ تک ٹریفک بند رہے گا۔مزید بتایا گیا ہے کہ نیسکام سے آئی ٹین کی طرف جانے والی سروس روڈ بند رہے گی جبکہ آئی ایٹ سے آئی ے پی ڈبل روڈ دونوں اطراف سے بند رہے گی۔ راول ڈیم چوک سے کشمیر چوک تک کلب روڈ ایک طرف سے بند ہوگی۔اس کے علاوہ پارک روڈ پر شہزاد ٹاؤن سے مشرف چوک تک ایک سائیڈ بند رہے گی۔ٹریفک پولیس نے شہریوں سے اپیل کی ہے کہ وہ غیر ضروری سفر سے گریز کریں اور سفر کے لیے اضافی وقت لے کر نکلیں۔ مزید معلومات کے لیے شہری پکار 15 یا ٹریفک ہیلپ لائن 1915 پر رابطہ کر سکتے ہیں جبکہ ٹریفک کی تازہ صورتحال کے لیے اسلام آباد ٹریفک پولیس ایف ایم 92.4 سے بھی رہنمائی حاصل کی جا سکتی ہے۔
