لاہور: پنجاب کے محکمہ تعلیم نے طلبہ کی تعلیمی کارکردگی بہتر بنانے اور نصاب کی بروقت تکمیل کو یقینی بنانے کے لیے اسکولوں کی چھٹیوں میں کمی کی تجویز پر غور شروع کر دیا ہے۔تفصیلات کے مطابق پرائیویٹ اسکولز کی جانب سے مطالبہ کیا گیا ہے کہ آئندہ تعلیمی سال کے دوران ہفتہ وار چھٹیوں کو ختم یا کم کیا جائے تاکہ تعلیمی کیلنڈر کو کم از کم 180 دن تک بڑھایا جا سکے۔پاکستان ایجوکیشن فورم کے سربراہ قاضی نعیم انجم نے تجویز دی ہے کہ موسمِ گرما کی تعطیلات کو صرف دو ماہ تک محدود کیا جائے، جبکہ جنوری میں ہونے والی موسمِ سرما کی چھٹیوں کو 10 دن تک کر دیا جائے۔قاضی نعیمانجم کے مطابق گزشتہ سال غیر اعلانیہ تعطیلات کے باعث صرف 127 دن تعلیمی سرگرمیاں جاری رہ سکیں، جس کے نتیجے میں نصاب کی تکمیل میں مشکلات پیش آئیں۔انہوں نے نصاب کی مؤثر تکمیل کے لیے تعطیلات کے دوران سمر کیمپس متعارف کرانے کی بھی سفارش کی ہے تاکہ طلبہ کو اضافی تعلیمی سہولت فراہم کی جا سکے۔واضح رہے کہ مشرقِ وسطیٰ میں بڑھتی ہوئی کشیدگی اور ہنگامی صورتحال کے باعث پنجاب حکومت نے پہلے ہی صوبے بھر کے سرکاری اور نجی اسکولوں کو 10 مارچ سے 31 مارچ تک بند رکھنے کا فیصلہ کیا ہے۔محکمہ تعلیم نے اسکولوں کو یقین دہانی کرائی ہے کہ ان کی تجاویز پر سنجیدگی سے غور کیا جائے گا اور تعلیمی معیار بہتر بنانے کے لیے مناسب اقدامات کیے جائیں گے۔
