ریاض (ویب ڈیسک): وال اسٹریٹ جرنل کی رپورٹ کے مطابق سعودی عرب میں واقع شہزادہ سلطان ایئربیس پر حالیہ ایرانی میزائل حملوں کے نتیجے میں امریکی فضائیہ کے 5 جنگی طیارے متاثر ہوئے ہیں۔
رپورٹ میں بتایا گیا ہے کہ ایران نے حالیہ دنوں میں اس ایئربیس کو میزائلوں سے نشانہ بنایا جس کے نتیجے میں امریکی فضائیہ کے 5 ری فیولنگ طیارے زد میں آ گئے۔
امریکی حکام کے مطابق حملے میں طیاروں کو نقصان پہنچا ہے تاہم وہ مکمل طور پر تباہ نہیں ہوئے۔ متاثرہ طیاروں کی مرمت کا کام ایئربیس پر ہی جاری ہے جبکہ خوش قسمتی سے اس حملے میں کوئی جانی نقصان نہیں ہوا۔
رپورٹ کے مطابق امریکی سینٹرل کمانڈ نے اس واقعے پر فی الحال کسی بھی قسم کا باضابطہ تبصرہ کرنے سے انکار کر دیا ہے، تاہم امریکی حکام کے حوالے سے طیاروں کو پہنچنے والے نقصانات کی تصدیق کی گئی ہے۔
ماہرین کے مطابق سعودی عرب میں امریکی فوجی اڈے کو نشانہ بنانا خطے میں کشیدگی میں مزید اضافے کا باعث بن سکتا ہے اور اس واقعے کو ایران کی ایک بڑی کارروائی تصور کیا جا رہا ہے، جس پر امریکہ اور سعودی عرب کے دفاعی حلقے گہری نظر رکھے ہوئے ہیں۔
