تہران (ویب ڈیسک): ایران کے عسکری مرکز خاتم الانبیا سینٹرل ہیڈکوارٹرز نے دشمن ممالک کو سخت وارننگ دیتے ہوئے کہا ہے کہ خطے میں جہاں بھی دشمن موجود ہوگا اسے نشانہ بنایا جائے گا اور اس کے ٹھکانوں کو ملبے کا ڈھیر بنا دیا جائے گا۔
جاری بیان میں کہا گیا ہے کہ ایرانی افواج دشمن کے ٹھکانوں کو تلاش کرنے اور انہیں تباہ کرنے کی مکمل صلاحیت رکھتی ہیں۔ بیان کے مطابق اگر دشمن کی جانب سے کسی بھی قسم کی مہم جوئی کی گئی تو اس کا سخت اور منہ توڑ جواب دیا جائے گا۔
ہیڈکوارٹرز کے ترجمان نے دعویٰ کیا کہ ایرانی حملوں اور حکمتِ عملی کے باعث دشمن شدید دباؤ اور بوکھلاہٹ کا شکار ہو چکا ہے۔ ان کے مطابق دشمن کو حالیہ عرصے میں مسلسل تکنیکی خرابیوں اور نقصانات کا سامنا کرنا پڑ رہا ہے۔
یہ بیان ایسے وقت میں سامنے آیا ہے جب مشرقِ وسطیٰ میں کشیدگی عروج پر ہے اور مختلف مقامات پر فوجی تنصیبات کو نشانہ بنائے جانے کی اطلاعات بھی سامنے آ رہی ہیں۔ ایرانی حکام کا کہنا ہے کہ دشمن کے دفاعی نظام کی ناکامیاں اور حالیہ نقصانات اس کی واضح مثال ہیں۔
