کویت سٹی (ویب ڈیسک): مشرقِ وسطیٰ میں بڑھتی ہوئی کشیدگی کے دوران کویت کی بڑی آئل ریفائنری مینا الاحمدی ریفائنری پر ڈرون حملہ کیا گیا، جس کے نتیجے میں خوفناک آگ بھڑک اٹھی۔
غیر ملکی ذرائع ابلاغ کے مطابق کویتی حکام کا کہنا ہے کہ یہ کارروائی ایران کی جانب سے خلیجی ممالک کی توانائی تنصیبات کو نشانہ بنانے کے سلسلے کی ایک کڑی ہو سکتی ہے۔
کویت نیوز ایجنسی نے قومی پیٹرولیم کمپنی کے حوالے سے بتایا کہ آج متعدد ڈرونز نے مینا الاحمدی ریفائنری کو نشانہ بنایا۔ حملے کے بعد ریفائنری کے مختلف حصوں میں آگ لگ گئی، جس کے باعث آپریشنل یونٹس کو فوری طور پر بند کر دیا گیا۔
سرکاری خبر ایجنسی کے مطابق ابتدائی طور پر کسی جانی نقصان کی اطلاع نہیں ملی، جبکہ آگ پر قابو پانے کے لیے فائر بریگیڈ کا عملہ موقع پر موجود ہے۔
