خیرپور (نیوز ڈیسک) – پاکستان کے توانائی شعبے میں اہم پیش رفت سامنے آئی ہے جہاں Oil and Gas Development Company Limited (او جی ڈی سی ایل) نے سندھ کے ضلع خیرپور میں گیس کے وسیع ذخائر دریافت ہونے کی تصدیق کر دی ہے۔
کمپنی کے جاری کردہ بیان کے مطابق سہتو-1 کنویں سے گیس کے نمایاں ذخائر برآمد ہوئے ہیں، جہاں سے یومیہ 17.2 ملین مکعب فٹ گیس حاصل ہونے کی توقع ہے۔
او جی ڈی سی ایل کے مطابق کنویں میں 3390 پی ایس آئی دباؤ ریکارڈ کیا گیا، جو مضبوط ذخائر کی نشاندہی کرتا ہے۔ سہتو-1 کنویں کی کھدائی دسمبر 2025 میں شروع کی گئی تھی اور 3870 میٹر گہرائی تک ڈرلنگ کے بعد گیس دریافت ہوئی۔
بیان میں مزید بتایا گیا کہ منصوبے میں او جی ڈی سی ایل کا 95 فیصد جبکہ Government Holdings (Private) Limited (جی ایچ پی ایل) کا 5 فیصد حصہ ہے۔
کمپنی کا کہنا ہے کہ نئی دریافت سے ملک میں مقامی گیس کی پیداوار میں اضافہ ہوگا اور توانائی کی ضروریات پوری کرنے میں مدد ملے گی۔
