واشنگٹن (نیوز ڈیسک) – امریکی صدر ڈونلڈ ٹرمپ نے دعویٰ کیا ہے کہ ایران نے ‘بڑے تحفے’ کے طور پر آبنائے ہرمز سے 8 تیل سے لدے بحری جہازوں کو گزرنے کی اجازت دی۔
ٹرمپ نے کابینہ کے اجلاس میں بتایا کہ یہ جہاز خیر سگالی کے طور پر گذرائے گئے تاکہ یہ ثابت ہو کہ ایران کی طرف سے پیغام بھیجا گیا ہے کہ وہ ‘اصلی لوگ’ ہیں۔ انہوں نے مزید کہا کہ کچھ جہاز پاکستان کے جھنڈے والے تھے۔
امریکی صدر نے کہا کہ ایران کو آبنائے ہرمز سے ٹول وصول کرنے کا حق نہیں ہونا چاہیے، مگر اس نے ایسا کیا۔
یہ پیشرفت ایسے وقت سامنے آئی ہے جب امریکہ ایران کے خلاف ‘آپریشن ایپک فیوری’ جاری رکھے ہوئے ہے، جس کا مقصد ایران کے ایٹمی اور فوجی ڈھانچے کو نشانہ بنانا تھا۔
ٹرمپ نے دعویٰ کیا کہ امریکی فوجی کارروائیوں کے نتیجے میں ایران کی بحریہ، فضائیہ اور میزائل سسٹم کو شدید نقصان پہنچا ہے، جس کے بعد ایران مذاکرات اور لچک کی طرف مائل نظر آ رہا ہے۔
