وزیراعلیٰ پنجاب مریم نواز کا بڑا ریلیف پیکیج، موٹر سائیکل مالکان کے لیے پیٹرول سبسڈی کا اعلان

لاہور (ویب ڈیسک) – وزیراعلیٰ پنجاب مریم نواز نے صوبے کے عوام کے لیے بڑے ریلیف پیکیج کا اعلان کر دیا، جس کا مقصد عام آدمی کے معاشی بوجھ میں کمی لانا ہے۔

تفصیلات کے مطابق ریلیف پیکیج کے تحت پنجاب بھر میں موٹر سائیکل کی رجسٹریشن چارجز اور ٹرانسفر فیس مکمل طور پر معاف کر دی گئی ہے۔ اس کے علاوہ حکومت پنجاب نے رجسٹرڈ موٹر سائیکل مالکان کے لیے پیٹرول پر خصوصی سبسڈی دینے کا فیصلہ بھی کیا ہے۔

ریلیف پیکیج کے مطابق ہر رجسٹرڈ موٹر سائیکل کو ماہانہ 20 لیٹر پیٹرول پر 2 ہزار روپے کی سبسڈی دی جائے گی، جس کے بعد پیٹرول 100 روپے فی لیٹر رعایت کے ساتھ دستیاب ہوگا۔

لاہور سمیت صوبے بھر میں اس پیکیج کا فوری آغاز کر دیا گیا ہے، جبکہ سبسڈی حاصل کرنے کے طریقہ کار کا بھی اعلان کیا گیا ہے۔

شہری فیول سبسڈی سے متعلق معلومات اور رجسٹریشن کے لیے ہیلپ لائن “1000” پر کال کر سکتے ہیں یا موبائل ایپلی کیشن “مریم کو بتائیں” استعمال کر سکتے ہیں۔

اس موقع پر وزیراعلیٰ مریم نواز کا کہنا تھا کہ حکومت عام آدمی کی زندگی میں آسانیاں پیدا کرنے اور معاشی بوجھ کم کرنے کے لیے دن رات کوشاں ہے، اور یہ پیکیج اسی سلسلے کی ایک اہم کڑی ہے۔