نیوز ڈیسک
اسلام آباد: وکیل اور سماجی کارکن ایمان مزاری اور ان کے شوہر، وکیل ہادی علی چٹھہ کو اڈیالہ جیل سے رہائی کے کچھ ہی دیر بعد دوبارہ گرفتار کر لیا گیا۔
پولیس ذرائع کے مطابق اسلام آباد پولیس نے دونوں کو دوبارہ حراست میں لیا اور اڈیالہ جیل سے اپنے ہمراہ لے گئی۔
اس سے قبل جمعرات کو سپریم کورٹ نے ایمان مزاری اور ہادی علی چٹھہ کی ضمانت منظور کرتے ہوئے ٹرائل کورٹ کا فیصلہ معطل کر دیا تھا۔ عدالت نے دونوں کی رہائی کو فی کس 2 لاکھ روپے کے ضمانتی مچلکے جمع کرانے سے مشروط کیا تھا۔
جسٹس نعیم اختر افغان نے قرار دیا کہ دونوں کو اسلام آباد ہائی کورٹ میں زیرِ سماعت مقدمے کے حتمی فیصلے تک ضمانت دی جا رہی ہے۔
سماعت کے دوران عدالت نے ریمارکس دیے کہ ایمان مزاری اور ہادی علی چٹھہ دونوں وکلاء ہیں، اس لیے ان کے وقار کا احترام کیا جانا چاہیے۔ تاہم، عدالت نے انہیں عدالتی وقار اور آداب برقرار رکھنے کی ہدایت بھی کی۔
جسٹس نعیم اختر افغان نے مزید کہا کہ وکیل کی حیثیت اور عام شہری کی حیثیت میں فرق ہوتا ہے۔
