لاہور (ویب ڈیسک) – پنجاب کی وزیر اطلاعات عظمیٰ بخاری نے کہا ہے کہ الحمد للہ ایک بار پھر پنجاب عوام کو رلیف دینے میں تمام صوبوں سے آگے ہے، اور جب بھی عوام کو سہولت فراہم کرنے کا موقع آئے گا، پنجاب سب سے آگے ہوگا۔
اپنے بیان میں انہوں نے کہا کہ وزیر اعلیٰ مریم نواز عوام کو رلیف دیتے ہوئے دلی سکون محسوس کرتی ہیں اور پنجاب کی عوام کو کبھی اکیلا نہیں چھوڑا بلکہ ہر مشکل میں ان کے ساتھ کھڑی رہی ہیں۔
عظمیٰ بخاری نے کہا کہ مریم نواز کی قیادت میں پورے پنجاب میں پبلک ٹرانسپورٹ مکمل طور پر مفت کر دی گئی ہے، اور جنگ کی صورتحال برقرار رہنے تک شہری پبلک ٹرانسپورٹ میں بالکل مفت سفر کریں گے۔ انہوں نے کہا کہ مریم نواز نے کسانوں کو ترجیح دی اور گزشتہ دو سال کے دوران تاریخی اقدامات کیے، جبکہ پنجاب کے کسان پورے پاکستان کو زرعی بیج فراہم کرتے ہیں۔
وزیر اطلاعات نے تنقید کرتے ہوئے کہا کہ سوشل میڈیا پر عوام کی خیرخواہی کا دعویٰ کرنے والی صوبائی حکومتیں اور ان کی پارٹیاں خاموش ہیں۔
عظمیٰ بخاری نے مزید کہا کہ وزیر اعظم شہباز شریف نے پیٹرول کی قیمت میں 80 روپے کی کمی کر دی اور عوام پر بوجھ ڈالنے کے بجائے اپنی کابینہ کے اجرتوں میں کمی کی، اور کفایت شعاری مہم سے حاصل ہونے والی رقم کے فوائد عام لوگوں تک پہنچائے جا رہے ہیں۔
