ٹنڈوالہ یار: شادی کی ایک تقریب میں کھانا کھانے کے بعد دلہا دلہن سمیت تقریباً 400 افراد کی حالت غیر ہوگئی، جس کے باعث مقامی اسپتال میں ایمرجنسی نافذ کرنا پڑی۔
ذرائع کے مطابق گزشتہ رات شادی کی تقریب میں کھانا کھانے کے بعد بڑی تعداد میں شرکا کی طبیعت اچانک خراب ہوگئی۔ متاثرہ افراد میں خواتین اور بچوں سمیت مرد بھی شامل ہیں، جبکہ بعض افراد کے بے ہوش ہونے کی بھی اطلاعات ہیں۔
مریضوں کی بڑی تعداد اسپتال پہنچنے پر طبی عملے کو ہنگامی بنیادوں پر متحرک کیا گیا اور متاثرہ افراد کو طبی امداد فراہم کی گئی۔ حکام کے مطابق زیادہ تر مریضوں کو ابتدائی علاج کے بعد اسپتال سے ڈسچارج کر دیا گیا۔
واقعے کی اطلاع ملنے پر متعلقہ حکام نے تحقیقات شروع کر دی ہیں، جبکہ تقریب میں پیش کیے جانے والے کھانے کے نمونے حاصل کرکے لیبارٹری ٹیسٹ کے لیے بھیج دیے گئے ہیں۔
حکام کے مطابق واقعے کی اصل وجہ لیبارٹری رپورٹس اور تحقیقات مکمل ہونے کے بعد سامنے آئے گی۔
