نیوز ڈیسک
اسلام آباد: وفاقی وزیرِ صحت سید مصطفیٰ کمال اور وزیراعظم کی فوکل پرسن برائے انسدادِ پولیو عائشہ رضا فاروق نے ملک میں ذیلی قومی انسدادِ پولیو مہم کا افتتاح کردیا۔ اس موقع پر دونوں رہنماؤں نے بچوں کو پولیو سے بچاؤ کے قطرے بھی پلائے۔
حکام کے مطابق انسدادِ پولیو مہم 21 سے 27 ستمبر تک ملک کے 115 منتخب اضلاع میں جاری رہے گی، جس کے دوران تقریباً 3 کروڑ 10 لاکھ بچوں کو پولیو سے بچاؤ کے قطرے پلانے کا ہدف مقرر کیا گیا ہے۔
وفاقی وزیرِ صحت سید مصطفیٰ کمال نے کہا کہ حکومت وزیراعظم کی قیادت میں ملک سے پولیو کے مکمل خاتمے کے لیے پُرعزم ہے اور اس مقصد کے لیے مؤثر اور مربوط قومی ردِعمل کو مزید مضبوط بنایا جا رہا ہے۔
انہوں نے کہا کہ حکومت ہر بچے تک پولیو ویکسین کی بروقت رسائی یقینی بنانے کے لیے تمام دستیاب وسائل بروئے کار لا رہی ہے، جبکہ انسدادِ پولیو مہم اور معمول کے حفاظتی ٹیکہ جات کے پروگرام کے درمیان مؤثر رابطہ اور ہم آہنگی بھی مزید بہتر بنائی جا رہی ہے۔
وفاقی وزیر نے کہا کہ پولیو کے مکمل خاتمے کے لیے والدین، کمیونٹی رہنماؤں اور تمام متعلقہ اداروں کا تعاون ناگزیر ہے۔ انہوں نے کہا کہ پانچ سال سے کم عمر ہر بچے کو پولیو ویکسین پلوانا قومی ذمہ داری ہے۔
افتتاحی تقریب میں نیشنل کوآرڈینیٹر، شراکت دار اداروں کے نمائندگان اور پولیو پروگرام کی کور ٹیم کے ارکان بھی موجود تھے۔
