نیوز ڈیسک
سعودی ولی عہد محمد بن سلمان کی درخواست پر صدر ٹرمپ نے امریکی فوج کو حوثیوں کے خلاف ممکنہ فضائی حملوں کی تیاری کی ہدایت کی تھی، تاہم کارروائی شروع ہونے سے کچھ دیر قبل انہوں نے حملے روکنے کا فیصلہ کرلیا۔
رپورٹس کے مطابق امریکی فوج حوثیوں کے خلاف ممکنہ کارروائی کے لیے اہداف کی فہرستیں تیار کرچکی تھی اور حملے کی فوجی تیاریاں بھی آگے بڑھ چکی تھیں۔
امریکی صدر کے قریبی حلقوں میں موجود بعض حکام اور سابق و موجودہ امریکی اہلکاروں نے حوثیوں کے خلاف ایک اور فوجی مہم شروع کرنے پر تحفظات کا اظہار کیا تھا۔
دوسری جانب امریکی محکمہ خارجہ اور خطے میں موجود امریکی سفارتی مشنز نے اپنے شہریوں کے لیے سیکیورٹی الرٹس جاری کیے ہیں۔ امریکی شہریوں کو مشرق وسطیٰ کے سفر کے دوران احتیاط برتنے اور خطے کی سیکیورٹی صورتحال پر نظر رکھنے کی ہدایت کی گئی ہے۔
یمن میں حوثیوں کی سرگرمیوں اور سعودی عرب کے ساتھ جاری کشیدگی کے باعث خطے میں صورتحال مزید حساس ہوگئی ہے، جبکہ باب المندب اور بحیرہ احمر کے اہم بحری راستوں پر بھی خدشات برقرار ہیں۔
