نیوز ڈیسک
اسلام آباد: محکمہ موسمیات نے آئندہ 12 گھنٹوں کے دوران ملک کے بیشتر علاقوں میں موسم خشک رہنے کی پیشگوئی کی ہے، جبکہ میدانی علاقوں میں دن کے اوقات میں موسم گرم رہنے کا امکان ہے۔
محکمہ موسمیات کے مطابق شمالی پہاڑی علاقوں میں دوپہر کے وقت مطلع جزوی طور پر ابر آلود رہ سکتا ہے۔
کراچی میں کم سے کم درجہ حرارت 27 ڈگری سینٹی گریڈ ریکارڈ کیا گیا، جبکہ ہوا میں نمی کا تناسب 74 فیصد رہا۔ شہر میں زیادہ سے زیادہ درجہ حرارت 37 سے 39 ڈگری سینٹی گریڈ کے درمیان رہنے کا امکان ہے اور موسم گرم و مرطوب رہنے کی توقع ہے۔
بلوچستان کے بیشتر اضلاع میں موسم گرم اور خشک رہنے کی پیشگوئی کی گئی ہے۔ تاہم بارکھان، موسیٰ خیل، زیارت، ہرنائی، ژوب، شیرانی اور خضدار میں ہلکی بارش کا امکان ہے، جبکہ بعض علاقوں میں تیز ہوائیں چل سکتی ہیں۔
پشاور میں موسم جزوی طور پر ابر آلود اور خشک رہنے کی توقع ہے، جہاں زیادہ سے زیادہ درجہ حرارت 34 ڈگری سینٹی گریڈ تک پہنچ سکتا ہے۔ خیبر پختونخوا کے میدانی اضلاع میں دن کے وقت موسم گرم اور مرطوب رہنے کا امکان ہے۔
محکمہ موسمیات کے مطابق نوشہرہ، کوہاٹ، ہنگو، کرم، باجوڑ اور مہمند میں ہلکی بوندا باندی ہو سکتی ہے، جبکہ دیر، سوات، کوہستان، شانگلہ اور ایبٹ آباد میں تیز ہواؤں اور گرج چمک کے ساتھ بارش متوقع ہے۔
خیبر، کرک، لکی مروت، ڈیرہ اسماعیل خان اور وزیرستان میں بھی تیز ہواؤں کے ساتھ ہلکی بارش کا امکان ظاہر کیا گیا ہے۔
محکمہ موسمیات نے بارش اور تیز ہواؤں کی پیشگوئی والے علاقوں کے مکینوں کو احتیاطی تدابیر اختیار کرنے اور موسم کی صورتحال پر نظر رکھنے کی ہدایت کی ہے۔
