اسلام آباد
پاکستان کے مختلف علاقوں میں موسم کا رخ تبدیل ہونا شروع ہو گیا ہے۔ کراچی میں مطلع ابر آلود رہنے کے ساتھ پنجاب، کے پی, کشمیر، گلگت بلتستان اور بلوچستان کے کئی علاقوں میں تیز بارش، آندھی اور ژالہ باری کی پیشگوئی کی گئی ہے۔
محکمہ موسمیات کے مطابق کراچی میں منگل کے روز موسم جزوی طور پر ابر آلود رہنے کا امکان ہے، جبکہ شہر کے بعض علاقوں میں ہلکی بارش اور بوندا باندی بھی متوقع ہے۔ بندرگاہی شہر میں زیادہ سے زیادہ درجہ حرارت 35 ڈگری سینٹی گریڈ سے کم رہنے کی توقع ہے۔
دوسری جانب صوبائی ڈیزاسٹر مینجمنٹ اتھارٹی (PDMA) پنجاب نے صوبے بھر میں بارش، تیز ہواؤں اور ژالہ باری سے متعلق الرٹ جاری کر دیا ہے۔
پی ڈی ایم اے کے ترجمان کے مطابق پنجاب کے بیشتر اضلاع میں آج سے بارشوں کا سلسلہ شروع ہونے کا امکان ہے، جو 20 جون تک جاری رہ سکتا ہے۔
ڈی جی پی ڈی ایم اے عمر جاوید نے کہا کہ وزیراعلیٰ پنجاب مریم نواز کی ہدایت پر تمام کمشنرز اور ڈپٹی کمشنرز کو الرٹ رہنے اور کسی بھی ہنگامی صورتحال سے نمٹنے کے لیے پیشگی انتظامات یقینی بنانے کی ہدایت جاری کر دی گئی ہے۔
محکمہ موسمیات اور پی ڈی ایم اے کے مطابق راولپنڈی، مری، گلیات اور دیگر شمالی اضلاع میں بارش کا امکان ہے، جبکہ پنجاب کے وسطی اور جنوبی ڈویژنز کے مختلف علاقوں میں بھی بارش متوقع ہے۔
اسلام آباد میں موسم گرم اور جزوی طور پر ابر آلود رہنے کی پیشگوئی کی گئی ہے، جبکہ مری، گلیات، جہلم اور بہاولپور میں بارش اور تیز ہواؤں کا امکان ظاہر کیا گیا ہے۔
پی ڈی ایم اے نے شہریوں کو ہدایت کی ہے کہ گرج چمک اور آندھی کے دوران محفوظ مقامات پر رہیں اور تیز ہواؤں یا گرد آلود طوفان کے دوران غیر ضروری طور پر کھلے مقامات پر جانے سے گریز کریں۔
بالائی خیبرپختونخوا، آزاد کشمیر اور گلگت بلتستان میں بھی بارش کی توقع ہے۔ سندھ کے بالائی اضلاع میں وقفے وقفے سے بارش ہو سکتی ہے، جبکہ بلوچستان کے بعض علاقوں، بشمول بارکھان، ڈیرہ بگٹی اور خضدار میں بھی بارش کا امکان ظاہر کیا گیا ہے۔
دریں اثنا ملک کے بعض گرم ترین علاقوں میں شدید گرمی کی لہر برقرار ہے۔ محکمہ موسمیات کے مطابق پیر کے روز نوکنڈی میں سب سے زیادہ درجہ حرارت 48 ڈگری سینٹی گریڈ ریکارڈ کیا گیا، جبکہ سبی اور دادو میں درجہ حرارت 47 ڈگری سینٹی گریڈ تک پہنچ گیا۔
ماہرین موسمیات کا کہنا ہے کہ مختلف علاقوں میں متوقع بارشوں کے باعث آنے والے دنوں میں ہیٹ ویو کی شدت میں کمی آنے کا امکان ہے۔ تاہم شہریوں سے اپیل کی گئی ہے کہ وہ موسم کی بدلتی صورتحال کے پیش نظر احتیاطی تدابیر اختیار کریں۔
