خیبرپختونخوا اور اسلام آباد میں تیز ہواؤں، گرج چمک اور موسلادھار بارش کے باعث موسم خوشگوار ہو گیا، تاہم کئی علاقوں میں ندی نالوں میں طغیانی اور نشیبی علاقوں میں پانی جمع ہونے سے شہریوں کو مشکلات کا سامنا کرنا پڑا۔
محکمہ موسمیات کے مطابق آئندہ چند روز کے دوران مزید بارشوں کا امکان ہے اور بارشوں کا سلسلہ 20 جون تک وقفے وقفے سے جاری رہ سکتا ہے۔
خیبرپختونخوا کے مختلف اضلاع میں بارشوں کا سلسلہ جاری ہے، جہاں ضلع شانگلہ کے میدانی اور بالائی علاقوں میں وقفے وقفے سے موسلادھار بارش ریکارڈ کی گئی۔ بارش کے باعث گرمی کی شدت میں کمی آئی اور موسم خوشگوار ہو گیا۔
ہری پور، تحصیل غازی اور خان پور میں بھی تیز بارش کے باعث کئی مقامات پر سڑکوں پر پانی جمع ہو گیا، جبکہ جی ٹی روڈ پر بعض مقامات پر دریا جیسی صورتحال پیدا ہو گئی۔ نشیبی علاقے زیر آب آنے سے شہریوں کو آمدورفت میں مشکلات کا سامنا کرنا پڑا۔
محکمہ موسمیات کے مطابق ہری پور اور گردونواح میں بارشوں کا سلسلہ آئندہ دو روز تک وقفے وقفے سے جاری رہنے کا امکان ہے۔
سوات کے علاقے مینگورہ میں بارش کے بعد ندی نالوں میں طغیانی دیکھی گئی، جبکہ متعدد علاقے زیر آب آ گئے۔ پانی کی سطح بلند ہونے سے ٹریفک اور معمولات زندگی متاثر ہوئے۔
صوبے کے دیگر شمالی علاقوں میں بھی مطلع ابر آلود ہے اور مختلف مقامات پر بارش کا سلسلہ جاری ہے۔
دوسری جانب اسلام آباد میں بھی موسلادھار بارش کے بعد موسم خوشگوار ہو گیا۔ جڑواں شہروں میں گرمی کی شدت میں واضح کمی آئی اور موسم خوشگوار ہو گیا۔
محکمہ موسمیات کے مطابق اسلام آباد میں بارش کا سلسلہ کل تک جاری رہنے کا امکان ہے جبکہ خیبرپختونخوا کے مختلف اضلاع میں 20 جون تک وقفے وقفے سے بارشیں جاری رہ سکتی ہیں۔
بارشوں کے پیش نظر ضلعی انتظامیہ کو الرٹ کر دیا گیا ہے۔ ڈپٹی کمشنر اسلام آباد نے اسسٹنٹ کمشنرز کو ہدایت کی ہے کہ وہ صورتحال کی مسلسل نگرانی کریں تاکہ کسی بھی ہنگامی صورتحال سے بروقت نمٹا جا سکے۔
محکمہ موسمیات نے شہریوں کو ہدایت کی ہے کہ وہ بارش کے دوران احتیاطی تدابیر اختیار کریں اور ندی نالوں کے قریب غیر ضروری آمدورفت سے گریز کریں۔
