اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر کے لیے موسمی ایڈوائزری جاری کرتے ہوئے آئندہ 12 سے 24 گھنٹوں کے دوران مختلف علاقوں میں گرج چمک، تیز ہواؤں، گرد آلود طوفانوں اور موسلا دھار بارشوں کی پیش گوئی کی ہے۔
نیشنل ایمرجنسی آپریشن سینٹر (این ای او سی) کے مطابق یہ موسمی صورتحال ادارے کی جانب سے کئی ماہ قبل جاری کیے گئے موسمی منظرنامے اور پیش گوئیوں کے مطابق ہے۔
این ڈی ایم اے نے خبردار کیا ہے کہ شدید بارشوں کے باعث شہری علاقوں میں اربن فلڈنگ، اچانک سیلاب، لینڈ سلائیڈنگ اور گلیشیائی جھیلوں کے پھٹنے سے پیدا ہونے والے سیلابی ریلوں (GLOFs) کا خطرہ بڑھ سکتا ہے، خصوصاً حساس اور پہاڑی علاقوں میں۔
ادارے کے مطابق وفاقی، صوبائی اور ضلعی حکام کے ساتھ پیشگی انتباہات اور خطرات سے متعلق معلومات کا تبادلہ کیا جا رہا ہے تاکہ بروقت تیاری اور مؤثر ردِعمل کو یقینی بنایا جا سکے۔
پنجاب اور اسلام آباد میں راولپنڈی، مری، اٹک، چکوال، تلہ گنگ، منڈی بہاؤالدین، سرگودھا، گجرات، جہلم، سیالکوٹ، گوجرانوالہ، لاہور، فیصل آباد، ملتان، بہاولپور اور رحیم یار خان سمیت متعدد اضلاع میں گرج چمک کے ساتھ بارش کا امکان ظاہر کیا گیا ہے۔
اسی طرح گلگت بلتستان اور آزاد جموں و کشمیر کے مختلف علاقوں، جن میں گلگت، سکردو، دیامر، استور، ہنزہ، غذر، گھانچے، مظفرآباد، وادی نیلم، راولاکوٹ اور میرپور شامل ہیں، میں بھی بارش اور گرج چمک کی پیش گوئی کی گئی ہے۔
این ڈی ایم اے نے گلگت بلتستان، خیبرپختونخوا اور آزاد کشمیر میں گلیشیائی جھیلوں کے پھٹنے کے بڑھتے ہوئے خطرات کے حوالے سے الگ الرٹ جاری کرتے ہوئے خبردار کیا ہے کہ ایسے واقعات اچانک سیلاب، لینڈ سلائیڈنگ اور ملبے کے بہاؤ کا سبب بن سکتے ہیں۔
خیبرپختونخوا کے اضلاع چترال، دیر، سوات، بٹگرام، مانسہرہ، ایبٹ آباد، ہری پور، صوابی، مردان، چارسدہ، پشاور، کوہاٹ، بنوں، ڈیرہ اسماعیل خان اور وزیرستان میں بھی گرج چمک کے ساتھ بارش متوقع ہے۔
بلوچستان میں تربت، کیچ، آواران، خضدار اور ژوب سمیت بعض علاقوں میں بارش اور گرج چمک کا امکان ہے، جبکہ سندھ کے شہر کراچی، جیکب آباد، سکھر، لاڑکانہ، خیرپور، دادو، گھوٹکی، کشمور، شکارپور اور شہید بینظیر آباد میں تیز ہواؤں، گرد آلود جھکڑوں اور بارش کی پیش گوئی کی گئی ہے۔
این ڈی ایم اے کے مطابق ضلعی انتظامیہ اور متعلقہ ادارے حساس علاقوں کی مسلسل نگرانی کر رہے ہیں اور انہیں ہائی الرٹ رہنے کی ہدایت جاری کی گئی ہے۔ ریسکیو اور ایمرجنسی رسپانس ٹیموں کو بھی کسی بھی ہنگامی صورتحال سے نمٹنے کے لیے مکمل تیار رہنے کا حکم دیا گیا ہے۔
سیاحوں اور مسافروں کو مشورہ دیا گیا ہے کہ شدید بارشوں کے دوران غیر ضروری سفر سے گریز کریں اور بالخصوص شمالی علاقوں کا رخ کرنے سے قبل موسم اور سڑکوں کی صورتحال سے آگاہی حاصل کریں، کیونکہ سیلاب، لینڈ سلائیڈنگ اور ملبے کے بہاؤ کے باعث آمدورفت متاثر ہو سکتی ہے۔
شہریوں سے اپیل کی گئی ہے کہ وہ سرکاری “پاک این ڈی ایم اے ڈیزاسٹر الرٹ” موبائل ایپ کے ذریعے تازہ ترین معلومات حاصل کرتے رہیں اور کسی بھی ہنگامی صورتحال میں مقامی انتظامیہ یا ریسکیو اداروں سے فوری رابطہ کریں۔
این ڈی ایم اے نے تمام صوبائی اور ضلعی انتظامیہ کو ہدایت کی ہے کہ وہ مکمل چوکسی برقرار رکھتے ہوئے احتیاطی اقدامات پر عمل درآمد یقینی بنائیں تاکہ متوقع موسمی نظام کے ممکنہ اثرات کو کم سے کم کیا جا سکے۔
