لاہور: مریم نواز شریف اور حنیف عباسی نے پنجاب میں ریلوے کے نظام کو جدید بنانے کے لیے ایک اہم معاہدے پر دستخط کر دیے ہیں، جس کے تحت صوبے میں جدید ٹرین سروسز متعارف کرائی جائیں گی۔معاہدے کے مطابق لاہور سے راولپنڈی کے درمیان پاکستان کی پہلی فاسٹ ٹرین چلائی جائے گی، جس سے 280 کلومیٹر کا سفر صرف سوا دو گھنٹے میں طے کیا جا سکے گا۔اس منصوبے کے تحت پنجاب کے 20 ریجنز میں 1415 کلومیٹر طویل ریلوے روٹس پر جدید ٹرینیں چلائی جائیں گی۔ حکومتِ پنجاب نئے انجن اور عالمی معیار کی کوچز فراہم کرے گی، جبکہ علاقائی سطح پر سفر کی سہولت کے لیے جدید ڈی ایم یو ٹرینیں بھی متعارف کرائی جائیں گی۔اہم مجوزہ روٹس میں شاہدرہ، نارووال اور سیالکوٹ، رائیونڈ سے قصور، پاکپتن اور لودھراں، شیخوپورہ سے جڑانوالہ اور شورکوٹ، لالہ موسیٰ سے سرگودھا، اور کوٹ ادو سے ڈیرہ غازی خان و کشمور شامل ہیں۔وزیرِ ریلوے حنیف عباسی کے مطابق ریلوے حادثات کی روک تھام کے لیے خودکار نظام متعارف کرایا جائے گا۔ اس کے علاوہ لاہور ریلوے اسٹیشن کو عالمی معیار کے مطابق اپ گریڈ کیا جائے گا اور شاہدرہ سے رائیونڈ تک ٹریک کے اطراف گرین پارکس اور شجرکاری کی جائے گی۔حکام کا کہنا ہے کہ اس منصوبے سے پنجاب کے کروڑوں عوام کو بہتر، تیز اور محفوظ سفری سہولیات میسر آئیں گی۔
