سلام آباد: وفاقی دارالحکومت میں پراپرٹی خریدنے کے خواہشمند افراد کے لیے اہم پیش رفت سامنے آئی ہے، فیڈرل بورڈ آف ریونیو نے مختلف سیکٹرز میں پراپرٹی کے سرکاری ویلیوایشن ریٹس میں 33 فیصد تک کمی کر دی ہے۔
تفصیلات کے مطابق ایف بی آر نے پراپرٹی ویلیوایشن میں کمی کا تیسرا نوٹیفکیشن جاری کرتے ہوئے شہر کے متعدد سیکٹرز کے نئے ریٹس مقرر کر دیے ہیں۔ یہ اقدام تاجروں اور سرمایہ کاروں کے مطالبے پر کیا گیا ہے تاکہ پراپرٹی مارکیٹ میں سرگرمی کو فروغ دیا جا سکے اور ٹیکس وصولی کو بہتر بنایا جا سکے۔
نئے نوٹیفکیشن کے تحت سیکٹر بی-17 میں قبضہ والے پلاٹ کا ریٹ 30 ہزار سے کم کرکے 21 ہزار روپے فی مربع گز جبکہ بغیر قبضہ پلاٹ کا ریٹ 15 ہزار سے کم کرکے 10 ہزار 500 روپے مقرر کیا گیا ہے۔ اسی طرح سی-14، سی-15 اور سی-16 میں بھی ویلیوایشن ریٹس میں نمایاں کمی کی گئی ہے۔
ڈی-12 میں پراپرٹی ویلیوایشن ایک لاکھ 30 ہزار سے کم کرکے 91 ہزار روپے فی مربع گز جبکہ ڈی-13 میں 16 ہزار سے کم کرکے 11 ہزار 500 روپے کر دی گئی ہے۔ ای-12، ایف-15، جی-13 اور جی-14 سمیت دیگر سیکٹرز میں بھی ریٹس کم کیے گئے ہیں۔
نوٹیفکیشن کے مطابق جی-15، جی-16، جی-17، آئی-11 اور آئی-14 میں بھی پراپرٹی ویلیوایشن میں واضح کمی کی گئی ہے، جس سے خریداروں کو ریلیف ملنے کی توقع ہے۔
تاہم اہم سیکٹرز جیسے ای-7، ایف-6 اور ایف-7 میں پراپرٹی ریٹس کو برقرار رکھا گیا ہے، جہاں قیمتیں بدستور بلند سطح پر موجود ہیں۔
ماہرین کے مطابق اس فیصلے سے نہ صرف رئیل اسٹیٹ مارکیٹ میں بہتری آئے گی بلکہ سرمایہ کاری کے مواقع بھی بڑھیں گے، جبکہ خریداروں کے لیے پراپرٹی خریدنا نسبتاً آسان ہو جائے گا۔
