اشنگٹن: وفاقی وزیرِ خزانہ محمد اورنگزیب نے کہا ہے کہ پاکستان عالمی کیپٹل مارکیٹوں تک رسائی کے لیے تیار ہے اور جلد یورو بانڈز اور روپے سے منسلک بانڈز جاری کرنے کی تیاری کر رہا ہے۔
یہ بات انہوں نے عالمی ریٹنگ ایجنسی Moody’s کے نمائندوں سے ملاقات کے دوران کہی، جس میں پاکستان کی معاشی صورتحال، International Monetary Fund پروگرام اور آئندہ مالیاتی حکمت عملی پر تفصیلی تبادلہ خیال کیا گیا۔
وزیرِ خزانہ نے بریفنگ دیتے ہوئے کہا کہ آئی ایم ایف کے ساتھ اسٹاف لیول معاہدہ کامیابی سے مکمل ہو چکا ہے اور جلد ایگزیکٹو بورڈ سے اس کی حتمی منظوری متوقع ہے۔ ان کا کہنا تھا کہ پاکستان نے یورو بانڈز کی تمام ادائیگیاں بروقت مکمل کر لی ہیں، جس سے عالمی مالیاتی منڈی میں ملک کی ساکھ بہتر ہوئی ہے۔
انہوں نے مزید بتایا کہ تمام عالمی قرض دہندگان کو وقت پر ادائیگیاں کی جا رہی ہیں اور ملک کی بیرونی معاشی پوزیشن مستحکم ہو رہی ہے۔ ان کے مطابق Saudi Arabia کی مالی معاونت سے پاکستان کی معیشت کو مزید سہارا ملے گا۔
توانائی کے شعبے سے متعلق وزیرِ خزانہ نے کہا کہ بحران سے نمٹنے اور سپلائی چین کو مستحکم بنانے کے لیے قیمتوں کی مکمل منتقلی کا نظام نافذ کیا جا چکا ہے، جبکہ کمزور طبقات کے لیے روایتی سبسڈی کے بجائے ٹارگٹڈ ڈیجیٹل سبسڈیز کا اجرا کیا گیا ہے تاکہ امداد براہِ راست مستحق افراد تک پہنچ سکے۔
انہوں نے اس عزم کا اعادہ کیا کہ حکومت معاشی استحکام کے لیے اصلاحات کے عمل کو جاری رکھے گی اور عالمی سرمایہ کاروں کا اعتماد بحال کرنے کے لیے مؤثر اقدامات کیے جا رہے ہیں۔
