اسلام آباد
واٹس ایپ ایک نئے فیچر کی آزمائش کر رہا ہے، جس کے تحت صارفین آسانی سے جان سکیں گے کہ ان کے کون سے رابطے اس وقت آن لائن ہیں۔
اس مقصد کے لیے ایپ میں ایک نیا سبز (گرین) ڈاٹ انڈیکیٹر متعارف کرایا جا رہا ہے، جو انسٹاگرام اور فیس بک میسنجر کے صارفین کے لیے پہلے سے مانوس ہے۔
ٹیکنالوجی ویب سائٹ WABetaInfo کے مطابق یہ فیچر فی الحال اینڈرائیڈ اور آئی او ایس کے محدود بیٹا صارفین کے لیے دستیاب ہے۔
اس تبدیلی کے تحت “آن لائن” کا تحریری لیبل ہٹا کر اس کی جگہ ایک چھوٹا سبز دائرہ دکھایا جائے گا، جس سے ایپ کا انٹرفیس مزید سادہ اور جدید نظر آئے گا۔
فی الحال یہ سبز ڈاٹ صرف رابطے کی پروفائل اسکرین پر نظر آتا ہے۔
جب کوئی صارف کسی رابطے کی چیٹ یا پروفائل معلومات کھولے گا تو اگر وہ شخص اس وقت واٹس ایپ استعمال کر رہا ہو، تو اس کی پروفائل تصویر کے نیچے دائیں جانب سبز رنگ کا ایک چھوٹا دائرہ ظاہر ہوگا۔
یہ انڈیکیٹر حقیقی وقت میں کام کرے گا۔ جیسے ہی کوئی صارف واٹس ایپ استعمال کرنا شروع کرے گا، سبز ڈاٹ ظاہر ہو جائے گا، جبکہ ایپ بند کرنے یا غیر فعال ہونے پر یہ خودکار طور پر غائب ہو جائے گا۔
واٹس ایپ نے واضح کیا ہے کہ اس نئے فیچر سے صارفین کی رازداری کی موجودہ پالیسی میں کوئی تبدیلی نہیں کی جا رہی۔ سبز ڈاٹ صرف انہی صارفین کو نظر آئے گا جنہیں متعلقہ شخص نے اپنی آن لائن حیثیت دیکھنے کی اجازت دی ہوگی۔
اگر کسی صارف نے اپنی “آن لائن” یا “لاسٹ سین” حیثیت مخصوص افراد یا تمام لوگوں سے چھپا رکھی ہے تو ان افراد کو سبز ڈاٹ بھی نظر نہیں آئے گا۔
اسی طرح جو صارف اپنی آن لائن حیثیت دوسروں سے مخفی رکھتے ہیں، وہ بھی دوسرے افراد کی آن لائن موجودگی نہیں دیکھ سکیں گے، جیسا کہ واٹس ایپ کی موجودہ پرائیویسی پالیسی میں ہے۔
رپورٹ کے مطابق میٹا مستقبل میں واٹس ایپ کے لیے مزید نئی تبدیلیوں پر بھی کام کر رہا ہے۔
بیٹا ورژن سے ظاہر ہوتا ہے کہ کمپنی ایک ایسے نئے “کانٹیکٹس ہب” کی تیاری میں مصروف ہے، جہاں صارفین ایک ہی جگہ یہ دیکھ سکیں گے کہ ان کے کون سے رابطے اس وقت آن لائن یا حال ہی میں فعال رہے ہیں۔
یہ نیا فیچر ابھی آزمائشی مرحلے میں ہے اور صرف محدود بیٹا صارفین کے لیے دستیاب ہے۔ اگر اس کی آزمائش کامیاب رہی تو آئندہ واٹس ایپ کی مستحکم اپ ڈیٹس میں اسے دنیا بھر کے تمام صارفین کے لیے متعارف کرائے جانے کا امکان ہے۔
