راولپنڈی (ویب ڈیسک): سیکیورٹی فورسز اور قانون نافذ کرنے والے اداروں نے ضلع خیبر میں مشترکہ انٹیلی جنس بیسڈ آپریشن کے دوران 22 خوارج کو ہلاک کر دیا۔
پاک فوج کے شعبہ تعلقات عامہ Inter-Services Public Relations (آئی ایس پی آر) کے مطابق کارروائی خوارج کی موجودگی کی اطلاع پر کی گئی، جس میں فتنہ الخوارج سے تعلق رکھنے والے 22 دہشت گرد مارے گئے۔
آئی ایس پی آر کے مطابق آپریشن کے دوران سیکیورٹی فورسز اور دہشت گردوں کے درمیان شدید فائرنگ کا تبادلہ ہوا، جبکہ ہلاک دہشت گرد علاقے میں دہشت گردی کی متعدد کارروائیوں میں ملوث تھے۔
کارروائی کے دوران بھاری مقدار میں اسلحہ اور دھماکا خیز مواد بھی برآمد کیا گیا۔ بیان کے مطابق زندہ گرفتار ہونے کے خوف سے خوارج کی اندھا دھند فائرنگ کے نتیجے میں ایک 10 سالہ معصوم بچہ بھی شہید ہوگیا۔
سیکیورٹی فورسز کا کہنا ہے کہ وژن عزمِ استحکام کے تحت دہشت گردی کے خلاف کارروائیاں پوری شدت سے جاری رہیں گی اور غیر ملکی حمایت یافتہ دہشت گردی کے خاتمے کے لیے عزم برقرار ہے
