اسلام آباد (ویب ڈیسک): حکومتی ذرائع کے مطابق پیٹرول کی ایکس ریفائنری قیمت 246 روپے 31 پیسے ہونے کے باوجود مختلف ٹیکسز اور مارجنز شامل ہونے کے بعد یہ قیمت بڑھ کر عوام کے لیے 399 روپے 86 پیسے فی لیٹر تک پہنچ جاتی ہے۔
تفصیلات کے مطابق فی لیٹر پیٹرول کی قیمت میں 23 روپے 72 پیسے کسٹم ڈیوٹی اور 7 روپے 32 پیسے ان لینڈ فریٹ مارجن شامل ہے۔ اسی طرح آئل مارکیٹنگ کمپنیوں کا مارجن 7 روپے 87 پیسے اور پمپ ڈیلرز کی کمیشن 8 روپے 64 پیسے مقرر ہے۔
ذرائع کا کہنا ہے کہ پیٹرول کی قیمت میں 103 روپے 50 پیسے پیٹرولیم لیوی اور 2 روپے 50 پیسے کلائمیٹ سپورٹ لیوی بھی شامل ہے، جس کے باعث اصل قیمت اور صارفین تک پہنچنے والی قیمت میں نمایاں فرق پیدا ہو جاتا ہے۔
حکومتی اعداد و شمار کے مطابق ایک لیٹر پیٹرول پر مجموعی طور پر 153 روپے 55 پیسے ٹیکسز، مارجنز اور منافع کی مد میں وصول کیے جا رہے ہیں، جبکہ ہائی اسپیڈ ڈیزل پر یہ رقم 116 روپے 46 پیسے ہے۔
ذرائع کے مطابق ہائی اسپیڈ ڈیزل کی ایکس ریفائنری قیمت 283 روپے 12 پیسے ہے، جو ٹیکسز اور دیگر اخراجات کے بعد بڑھ کر 399 روپے 58 پیسے فی لیٹر تک پہنچ جاتی ہے۔
ماہرین کا کہنا ہے کہ پیٹرولیم مصنوعات پر بھاری ٹیکسز کے باعث مہنگائی میں اضافہ ہو رہا ہے اور اس کا براہ راست اثر ٹرانسپورٹ، زراعت اور روزمرہ استعمال کی اشیاء پر پڑ رہا ہے۔
