کوہاٹ
کوہاٹ کی پرانی پولیس لائنز میں مسجد کے قریب ہونے والے ہولناک دھماکے میں شہید افراد کی تعداد 24 ہوگئی، جبکہ حملے کے بعد دہشت گردوں کے خلاف سیکیورٹی آپریشن بھی مکمل کر لیا گیا ہے۔
سیکیورٹی فورسز کے مطابق پولیس لائنز میں چھپے آخری دو خودکش بمباروں کو بھی ہلاک کر دیا گیا۔ کارروائی کے دوران مجموعی طور پر 7 خوارج مارے گئے، جس کے بعد پاک فوج کے کمانڈوز نے علاقے کو کلیئر کرکے پولیس کے حوالے کر دیا۔
کاؤنٹر ٹیررازم ڈیپارٹمنٹ (سی ٹی ڈی) حکام کے مطابق کارروائی میں 8 فتنہ الخوارج کو ہلاک کیا گیا، جبکہ ایلیٹ فورس اور سی ٹی ڈی کمانڈوز نے عمارت کے اہم حصوں کو کلیئر کیا۔ آپریشن کے دوران ایڈیشنل آئی جی سی ٹی ڈی قمر جواد بھی زخمی ہوئے۔
حکام کے مطابق ہلاک دہشت گردوں کی لاشیں جمع کی جا رہی ہیں، جبکہ دھماکے میں شہید ہونے والوں میں 17 پولیس اہلکار بھی شامل ہیں۔
دھماکے کے نتیجے میں 130 سے زائد افراد زخمی ہوئے، جن میں متعدد کی حالت تشویشناک بتائی جا رہی ہے۔ شہید پولیس اہلکاروں کی نماز جنازہ بھی ادا کر دی گئی ہے۔
دوسری جانب دھماکے کے 8 زخمیوں کو لیڈی ریڈنگ اسپتال منتقل کیا گیا۔ اسپتال حکام کے مطابق زیر علاج زخمیوں میں 6 پولیس اہلکار اور ایک شہری شامل ہیں، جبکہ ایک زخمی کو گزشتہ رات علاج کے بعد ڈسچارج کر دیا گیا۔ زیر علاج زخمیوں کی حالت تسلی بخش بتائی گئی ہے۔
