اسلام آباد
جماعت اسلامی اور حکومت کے درمیان مذاکرات کا پانچواں دور مکمل ہوگیا، جس میں حکومتی وفد نے سیکیورٹی خدشات کے پیش نظر جماعت اسلامی سے لانگ مارچ مؤخر کرنے کی درخواست کی۔
مذاکرات کے بعد جماعت اسلامی کے نائب امیر لیاقت بلوچ نے کہا کہ حکومت عوامی مطالبات پر عملی اقدامات کرے، بصورت دیگر احتجاج اور لانگ مارچ ضرور کیا جائے گا۔ ان کا کہنا تھا کہ لیوی کے خاتمے تک لانگ مارچ لازمی ہوگا۔
لیاقت بلوچ کے مطابق حکومتی وفد نے عوام کو جلد غیر معمولی ریلیف دینے کے لیے اقدامات کی یقین دہانی کرائی ہے۔ حکومتی نمائندوں نے مذاکرات کے دوران بتایا کہ حکومت کو عالمی مالیاتی فنڈ (آئی ایم ایف) کے دباؤ کا سامنا ہے اور آئی ایم ایف کا وفد بھی جلد پاکستان آ سکتا ہے۔
انہوں نے کہا کہ جماعت اسلامی کے طے شدہ پروگرام کے مطابق امیر جماعت اسلامی کی قیادت میں سپر لانگ مارچ کل کراچی سے شروع ہوگا۔
حکومتی وفد میں وفاقی وزیر احسن اقبال، وزیراعظم کے معاون خصوصی رانا ثناء اللہ اور صوبائی وزیر خواجہ سلمان رفیق شامل تھے۔
جماعت اسلامی کی جانب سے نائب امیر لیاقت بلوچ، قائم مقام سیکریٹری جنرل نذیر احمد جنجوعہ، عمیر ادریس، ضیاء الدین انصاری اور شکیل احمد ترابی نے مذاکرات میں شرکت کی۔
