نیوز ڈیسک
اسلام آباد: میڈیکل اور ڈینٹل کالجز میں داخلوں کے لیے میڈیکل اینڈ ڈینٹل کالج ایڈمیشن ٹیسٹ (MDCAT) 2026 کل ملک بھر میں منعقد ہوگا، جس کے لیے ایک لاکھ 38 ہزار سے زائد امیدوار رجسٹرڈ ہیں۔
پاکستان میڈیکل اینڈ ڈینٹل کونسل (PMDC) کے مطابق امتحان کے لیے ملک کے 34 شہروں میں امتحانی مراکز قائم کیے گئے ہیں، جبکہ سعودی عرب کے دارالحکومت ریاض میں بھی پاکستانی امیدواروں کے لیے مرکز بنایا گیا ہے۔
پی ایم ڈی سی کے اعداد و شمار کے مطابق اس سال مجموعی طور پر 138,160 امیدوار MDCAT میں شرکت کریں گے۔ پنجاب سے 49,199، خیبر پختونخوا سے 38,841 اور سندھ سے 34,233 امیدوار رجسٹرڈ ہیں۔
بلوچستان سے 9,923، آزاد کشمیر سے 2,761 اور گلگت بلتستان سے 1,721 امیدوار امتحان دیں گے، جبکہ اسلام آباد سے 1,245 اور ریاض سے 237 امیدوار رجسٹرڈ ہیں۔
پی ایم ڈی سی کے مطابق MDCAT کے لیے 8,000 سوالات پر مشتمل سوالاتی بینک تیار کیا گیا ہے۔ ہر صوبے کے لیے الگ سوالیہ پرچہ ترتیب دیا جائے گا، جبکہ کسی بھی ہنگامی صورت حال سے نمٹنے کے لیے کم از کم دو اضافی پرچے بھی تیار رکھے گئے ہیں۔
امتحان میں ہر امیدوار کو 180 سوالات پر مشتمل پرچہ دیا جائے گا۔
پی ایم ڈی سی کے مطابق MDCAT کے انعقاد کی ذمہ داری متعلقہ صوبائی حکام اور مقررہ جامعات کی ہے، جبکہ امتحان مکمل ہونے کے بعد متعلقہ جامعات سوالیہ پرچے اپنے پاس رکھنے کی مجاز ہوں گی۔
