نیوز ڈیسک
جدہ: جدہ میں سعودی اتحاد کی منصوبہ بندی سے متعلق اجلاس منعقد ہوا، جس میں خلیج عدن، آبنائے باب المندب اور بحیرۂ احمر سمیت اہم عالمی آبی گزرگاہوں میں بحری آمدورفت کو محفوظ اور بلا تعطل رکھنے کے اقدامات کا جائزہ لیا گیا۔
اجلاس میں عالمی برادری کے دوست ممالک سے تعلق رکھنے والے 154 بحری کمانڈرز اور سفیروں نے شرکت کی۔
سعودی کمانڈر عبداللہ بن سالم نے میڈیا سے گفتگو کرتے ہوئے کہا کہ بین الاقوامی آبی گزرگاہوں کا تحفظ اجتماعی ذمہ داری ہے۔ ان کا کہنا تھا کہ سلامتی کو لاحق ہر خطرے سے نمٹنے کے لیے اقدامات کیے جائیں گے اور کثیرملکی دفاعی اتحاد کی کوششوں کو مکمل طور پر بحال کیا گیا ہے۔
دوسری جانب یمن کے حوثی گروپ کی جانب سے لاحق ممکنہ خطرات کے پیش نظر سعودی عرب میں سکیورٹی اقدامات بھی جاری ہیں۔ سعودی سول ڈیفنس کے مطابق خطرے سے متعلق جاری کیے گئے دونوں الرٹس واپس لے لیے گئے ہیں۔
جمعے کی رات جدہ، الخرج، طائف اور جازان میں ساحلی علاقوں سے متعلق الرٹس جاری کیے گئے تھے۔ سعودی حکام نے شہریوں اور مقیم افراد پر زور دیا ہے کہ کسی بھی پیغام یا معلومات پر عمل کرنے سے قبل اس کی تصدیق ضرور کریں اور صرف سرکاری ذرائع سے جاری ہونے والی اطلاعات پر انحصار کریں۔
