نیوز ڈیسک
اسلام آباد: اسلام آباد پولیس نے کرکٹ ٹیموں کی آمد و رفت کے پیش نظر 12 اکتوبر کے لیے ٹریفک ایڈوائزری جاری کر دی ہے، جس کے تحت شہر کی اہم شاہراہوں پر ٹریفک کی روانی برقرار رکھنے کے لیے مختلف مقامات پر ڈائیورشنز لگائی جائیں گی۔ پولیس نے شہریوں کو ممکنہ ٹریفک جام سے بچنے کے لیے متبادل راستے اختیار کرنے اور سفر کے لیے اضافی وقت مختص کرنے کی ہدایت کی ہے۔
ٹریفک ایڈوائزری کے مطابق سری نگر ہائی وے پر سیرینا چوک سے نائنتھ ایونیو تک مختلف مقامات پر ٹریفک کی آمد و رفت متاثر ہونے کا امکان ہے۔
متبادل راستوں کی تفصیلات
سری نگر ہائی وے پر سفر کرنے والے شہریوں کو سہروردی روڈ، جی-8 اور جی-9 کی سروس روڈز اور زیرو پوائنٹ استعمال کرنے کا مشورہ دیا گیا ہے۔ فیض آباد سے آنے والی ٹریفک کو فیصل ایونیو، جبکہ نائنتھ ایونیو سے آنے والے مسافروں کو سروس روڈ ایسٹ استعمال کرنے کی ہدایت کی گئی ہے۔
کورال سے اسلام آباد آنے والے شہری اولڈ ایئرپورٹ روٹ، راول روڈ، راولپنڈی مری روڈ اور آئی جے پی روڈ کے ذریعے فقیر ایپی روڈ کا راستہ اختیار کر سکتے ہیں۔
پولیس کے مطابق کورال ایکسپریس وے، مری روڈ یا کلب روڈ کی بندش کی صورت میں لہتراڑ روڈ اور پارک روڈ متبادل راستوں کے طور پر استعمال کیے جا سکتے ہیں۔ اسلام آباد سے باہر جانے والے شہریوں کو جناح ایونیو اور مارگلہ روڈ اختیار کرنے کا مشورہ دیا گیا ہے۔
اسی طرح بھارہ کہو سے اسلام آباد آنے والے مسافروں کو ممکنہ ٹریفک رکاوٹوں سے بچنے کے لیے بنی گالہ اور پارک روڈ استعمال کرنے کی ہدایت کی گئی ہے۔
شہریوں کو اضافی وقت رکھنے کی ہدایت
اسلام آباد پولیس نے خبردار کیا ہے کہ ٹریفک ڈائیورشنز کے باعث شہر کی اہم شاہراہوں پر رش بڑھ سکتا ہے۔ شہریوں کو ہدایت کی گئی ہے کہ وہ اپنی منزل تک بروقت پہنچنے کے لیے سفر میں 20 سے 25 منٹ کا اضافی وقت رکھیں۔
اسلام آباد ٹریفک پولیس کے اہلکاروں کو مختلف مقامات پر تعینات کر دیا گیا ہے تاکہ ڈرائیوروں کی رہنمائی اور ٹریفک کی روانی برقرار رکھنے میں مدد فراہم کی جا سکے۔
پولیس نے شہریوں سے اپیل کی ہے کہ وہ سفر پر روانہ ہونے سے قبل اسلام آباد پولیس کے سرکاری سوشل میڈیا اکاؤنٹس سے تازہ ترین ٹریفک صورتحال اور متبادل راستوں سے متعلق معلومات حاصل کریں۔
