نیوز ڈیسک
واشنگٹن: امریکی صدر ڈونلڈ ٹرمپ کی وائٹ ہاؤس کی نئی ترجمان کیٹی زکریا کو اپنی پہلی پریس بریفنگ کے دوران اس وقت خفت کا سامنا کرنا پڑا جب وہ گفتگو کے دوران غلطی سے اپنے شوہر اور صدر ٹرمپ کے درمیان فرق بھول گئیں۔ اس غیر متوقع زبانی غلطی کے بعد انہوں نے تقریباً 14 منٹ میں بریفنگ ختم کر دی۔
گزشتہ روز ہونے والی پریس بریفنگ کے دوران کیٹی زکریا نے زیادہ تر وقت تیار شدہ تحریر پڑھتے ہوئے صدر ٹرمپ کی تعریف کی اور ان کی انتظامیہ کے اقدامات کو اجاگر کیا۔ تاہم، ان کی پہلی بریفنگ زبانی لغزش اور چند غیر معمولی لمحات کے باعث میڈیا کی توجہ کا مرکز بن گئی۔
بریفنگ کے آغاز میں کیٹی زکریا نے کہا کہ صدر ٹرمپ کے ساتھ کام کرنا ان کے لیے اعزاز کی بات ہے اور وہ طویل عرصے سے ان کے ساتھ کام کرنے کی خواہش رکھتی تھیں۔
بعد ازاں، ایک صحافی نے ان سے سوال کیا کہ وائٹ ہاؤس کی ترجمان جیسے مصروف اور دباؤ والے عہدے کی ذمہ داریاں نبھاتے ہوئے وہ اپنے چار بچوں کے لیے وقت کیسے نکالیں گی۔
جواب میں کیٹی زکریا نے اپنے شوہر، فلم پروڈیوسر ٹائلر زکریا، کا ذکر کرتے ہوئے کہا کہ بچوں کے ساتھ شام کا وقت نہ گزارنا ان کے لیے قابلِ قبول نہیں ہوگا۔ اسی گفتگو کے دوران انہوں نے کہا، ’’میرے صدر، معاف کیجیے، میرے شوہر یہاں موجود ہیں۔‘‘
اپنی اس زبانی غلطی پر کیٹی زکریا نے صورتِ حال کو سنبھالنے کی کوشش کرتے ہوئے کہا، ’’یہ بھی خوب رہی۔‘‘ تاہم، وہ قدرے گھبرائی ہوئی دکھائی دیں اور کچھ ہی دیر بعد بریفنگ روم سے چلی گئیں۔
برطانوی اخبار ڈیلی میل نے ان کی گفتگو کو قدرے مشینی انداز کا حامل قرار دیا، جبکہ دی انڈیپنڈنٹ نے ان کی پہلی پریس بریفنگ کو انتہائی خراب آغاز قرار دیا۔
دوسری جانب، صدر ڈونلڈ ٹرمپ نے اپنی نئی ترجمان کی کارکردگی کا دفاع کرتے ہوئے ان کی تعریف کی اور کہا کہ کیٹی زکریا نے بہترین کارکردگی دکھائی اور بہت اچھا کام کیا۔
