نیوز ڈیسک
میانوالی: پنجاب کے ضلع میانوالی میں گھر سے پردے کے بغیر باہر نکلنے پر مبینہ طور پر 13 سالہ لڑکی کو فائرنگ کرکے قتل کر دیا گیا۔ پولیس نے واقعے میں ملوث ہونے کے الزام میں مقتولہ کے کزن کو 24 گھنٹوں کے اندر گرفتار کر لیا۔
پولیس کے مطابق افسوسناک واقعہ بھٹیاں کے علاقے میں جمعرات کی شام پیش آیا، جہاں فائرنگ کے نتیجے میں کم عمر لڑکی جاں بحق ہوگئی۔ واقعے کا مقدمہ مقتولہ کے والد کی مدعیت میں تھانہ صدر میں درج کیا گیا۔
واقعے کا نوٹس لیتے ہوئے ڈی پی او میانوالی وقار عظیم نے پولیس کو ملزم کی فوری گرفتاری اور قانونی کارروائی کی ہدایت کی، جس کے بعد پولیس نے کارروائی کرتے ہوئے مبینہ ملزم کو 24 گھنٹوں کے اندر گرفتار کر لیا۔
پولیس کا کہنا ہے کہ گرفتار ملزم مقتولہ کا کزن ہے اور ابتدائی اطلاعات کے مطابق اس نے لڑکی کو گھر سے پردے کے بغیر باہر نکلنے پر فائرنگ کرکے قتل کیا۔
پولیس کے مطابق واقعے کی مزید تفتیش جاری ہے اور ملزم کے خلاف قانونی کارروائی عمل میں لائی جا رہی ہے۔
