نیوز ڈیسک
پاکستانی اداکار عمران عباس نے ٹیلی ویژن ڈراموں سے طویل عرصے سے غیر حاضر رہنے کی وجہ بتاتے ہوئے انکشاف کیا ہے کہ وہ فی الحال اداکاری کے بجائے اپنے کاروبار اور فلاحی سرگرمیوں پر توجہ دے رہے ہیں۔
عمران عباس پاکستان کی شوبز انڈسٹری کے مقبول اداکاروں میں شمار ہوتے ہیں۔ متعدد کامیاب ڈراموں میں اپنی اداکاری اور پرکشش شخصیت کے باعث انہوں نے ناظرین میں نمایاں مقبولیت حاصل کی ہے۔ سوشل میڈیا پر بھی ان کے مداحوں کی بڑی تعداد موجود ہے اور انسٹاگرام پر ان کے فالوورز کی تعداد تقریباً 8.6 ملین ہے۔
تاہم، گزشتہ کچھ عرصے سے وہ ٹیلی ویژن ڈراموں میں نظر نہیں آ رہے۔ حال ہی میں ایک ٹیلی ویژن شو میں فون پر گفتگو کرتے ہوئے اداکار نے بتایا کہ انہوں نے تقریباً دو سے تین سال قبل ڈراموں میں کام کرنا چھوڑ دیا تھا اور فی الحال ٹیلی ویژن پر واپسی کا ارادہ نہیں رکھتے۔
اپنی مصروفیات کے حوالے سے عمران عباس نے بتایا کہ وہ اس وقت رئیل اسٹیٹ کے کاروبار پر بھرپور توجہ دے رہے ہیں۔ پیشے کے اعتبار سے ماہرِ تعمیرات ہونے کے باعث وہ تعمیراتی شعبے سے بھی وابستہ ہیں اور اسلام آباد میں ایک بڑے منصوبے پر کام کر رہے ہیں۔
اداکار کے مطابق وہ اسلام آباد ایئرپورٹ کے قریب ممتاز سٹی میں ’ایری‘ (Eri) کے نام سے 12 منزلہ ٹاور تعمیر کر رہے ہیں، جس کی تکمیل میں تقریباً ڈھائی سال لگنے کی توقع ہے۔ انہوں نے کہا کہ ان دنوں ان کی زیادہ تر توجہ اسی منصوبے کی تکمیل پر مرکوز ہے۔
گفتگو کے دوران عمران عباس نے اپنی فلاحی سرگرمیوں کے بارے میں بھی بات کی۔ انہوں نے بتایا کہ ان کے والدین وفات پا چکے ہیں اور وہ غیر شادی شدہ ہیں، اس لیے ان پر بچوں کی پرورش جیسی خاندانی ذمہ داریاں نہیں ہیں۔ ان حالات میں وہ فلاحی کاموں کے لیے زیادہ وقت نکالنے کی کوشش کرتے ہیں۔
اداکار کا کہنا تھا کہ وہ فلاحی سرگرمیوں میں اس نیت سے حصہ لیتے ہیں کہ یہ کام ان کے لیے صدقۂ جاریہ بنیں اور آخرت میں بھی ان کے لیے باعثِ اجر ہوں۔
واضح رہے کہ عمران عباس اپنے کیریئر کے دوران متعدد مقبول پاکستانی ڈراموں میں اداکاری کے جوہر دکھا چکے ہیں۔ ان کے نمایاں ڈراموں میں ’نور العین‘، ’میری ذات ذرہ بے نشاں‘، ’خدا اور محبت‘، ’کوئی چاند رکھ‘، ’محبت تجھے الوداع‘، ’احرامِ جنون‘، ’تمہارے عشق کے نام‘ اور ’اکبری اصغری‘ شامل ہیں۔اس کے علاوہ، انہوں نے بھارتی شوبز انڈسٹری میں بھی کام کیا ہے اور سرحد پار اپنی اداکاری کے ذریعے پذیرائی حاصل کی ہے۔
