نیوز ڈیسک
اسلام آباد: پاک افغان سرحد کے مختلف مقامات پر فائرنگ کے واقعات کے بعد سرحدی کشیدگی میں اضافہ ہوگیا، جہاں سیکیورٹی ذرائع کے مطابق پاک فوج نے افغان طالبان کی جانب سے مبینہ بلااشتعال فائرنگ کا بھرپور جواب دیا۔ جوابی کارروائی میں متعدد افغان طالبان اہلکاروں کی ہلاکت کی اطلاعات ہیں، جبکہ فائرنگ کا تبادلہ تاحال جاری ہے۔
سیکیورٹی ذرائع کے مطابق تائدہ سیکٹر، اپر کرم اور غوزگڑھی کے علاقوں میں افغان طالبان کی جانب سے فائرنگ کے واقعات پیش آئے، جس کے بعد پاک فوج نے مؤثر کارروائی کرتے ہوئے سرحدی علاقوں میں قائم متعدد ٹھکانوں کو نشانہ بنایا۔
ذرائع کا دعویٰ ہے کہ افغان طالبان کی جانب سے فائرنگ کا مقصد مبینہ طور پر دہشت گردوں کو غیر قانونی طریقے سے پاکستانی حدود میں داخل کرانے کے لیے راستہ فراہم کرنا تھا، تاہم پاک فوج کی جوابی کارروائی کے باعث یہ کوشش ناکام ہوگئی۔
اپر کرم میں کارروائی کے دوران پاک فوج نے توپ خانے سے افغان طالبان کی ٹاپسر سرحدی پوسٹ اور شپولا بیس کیمپ کو نشانہ بنایا۔ سیکیورٹی ذرائع کے مطابق گولہ باری کے نتیجے میں شپولا بیس کیمپ مکمل طور پر تباہ ہوگیا، جبکہ افغان طالبان کی دیگر سرحدی چوکیوں کو بھی نقصان پہنچا۔
ادھر غوزگڑھی کے علاقے میں ہونے والی جوابی کارروائی کے دوران بھی متعدد افغان طالبان اہلکاروں کی ہلاکت کی اطلاعات موصول ہوئی ہیں۔ ذرائع کے مطابق کارروائی کے دوران افغان طالبان کے بعض اہلکار اپنی سرحدی پوسٹیں چھوڑ کر فرار ہوگئے۔
سرحدی علاقوں میں جاری فائرنگ کے باعث صورتحال بدستور کشیدہ ہے۔ سیکیورٹی ذرائع کا کہنا ہے کہ پاک فوج ملکی سرحدوں کے دفاع اور قومی سلامتی کے تحفظ کے لیے چوکس ہے اور کسی بھی ممکنہ خطرے سے نمٹنے کے لیے اقدامات جاری ہیں۔
تاحال ان واقعات، جانی نقصان اور سرحدی ٹھکانوں کو پہنچنے والے نقصان سے متعلق افغان طالبان کی جانب سے کوئی باضابطہ مؤقف سامنے آنے کی تصدیق نہیں ہوئی۔
