اسلام آباد:سینئر اداکارہ بشریٰ انصاری نے اپنی بیٹی نریمن انصاری اور نواسی شہرزاد کے ہمراہ ایک نجی ٹی وی کے مارننگ شو میں شرکت کی۔
اس موقع پر نریمن نے اپنے والدین کی طلاق اور والدہ کی دوسری شادی پر بات کی۔
نریمن نے کہا کہ وہ ہمیشہ جانتی تھیں کہ والدین کے درمیان مسائل ہیں اور بچپن میں وہ والدین کو صرف الگ ہونے کا کہتی تھیں تاکہ وہ دونوں خوش ہو سکیں اور بہتر والدین بن سکیں۔
نریمن نے یہ بھی کہا کہ چونکہ ہمارا دین اس کی اجازت دیتا ہے، اس لئے کوئی اور چیز اہم نہیں رہی، کیونکہ دین ہماری اولین ترجیح ہے۔
بشریٰ انصاری نے اس موقع پر گفتگو کرتے ہوئے کہا کہ ماضی کی باتوں کو عوامی سطح پر شیئر کرنا برا خیال ہے۔
جب آپ نے کسی کے ساتھ وقت گزارا ہو، تو آپ کو اس کا احترام کرنا چاہئے اور بچوں کی آنکھوں میں دوسرے ساتھی کی شبیہ کو نقصان نہیں پہنچانا چاہئے۔
والدین بچوں کی نظر میں ہیرو ہوتے ہیں اور انہیں ہیرو ہی رہنے دیا جانا چاہئے۔
بشریٰ نے کہا کہ انہیں اچھا نہیں لگتا کہ لوگ اپنے پارٹنرز کی برائیاں کریں، اور نہ ہی انہوں نے کبھی اقبال انصاری کے بارے میں منفی بات کی ہے، نہ ہی انہوں نے کبھی ان کے خلاف کچھ کہا۔
بشریٰ انصاری نے مزید بتایا کہ حال ہی میں ایک اینکر نے عوامی سطح پر اپنے مسائل شیئر کیے، لیکن اس کا کوئی فائدہ نہیں ہوا کیونکہ یہ چیزیں طویل عرصے تک کام نہیں کرتیں۔
