اسلام آباد:پاکستان شوبز انڈسٹری کی معروف اداکارہ جویریہ عباسی نے اپنی دوسری شادی کے تقریباً ساڑھے 5 ماہ بعد نکاح کی دلکش اور خوبصورت تصاویر شیئر کی ہیں۔
52 سالہ اداکارہ، جو اپنی بیٹی عنزیلہ عباسی کی شادی کے چند ماہ بعد دوبارہ نکاح کے بندھن میں بندھی ہیں، اس وقت سوشل میڈیا پر اپنی دوسری شادی کی وجہ سے توجہ کا مرکز بنی ہوئی ہیں۔
جویریہ نے سوشل میڈیا صارفین کے تجسس کو ختم کرتے ہوئے اپنے نکاح کی تصاویر اور ویڈیوز اپنے مداحوں کے ساتھ شیئر کی ہیں۔
فوٹو اور ویڈیو شیئرنگ پلیٹ فارم انسٹاگرام پر اداکارہ نے مختلف لمحات کی تصاویر و ویڈیوز اپ لوڈ کی ہیں، جن میں انہیں دلہن کے روپ میں دیکھا جا سکتا ہے۔
انہوں نے اپنے نکاح کے موقع پر شربتی اور سُنہرے رنگوں کے حسین عروسی جوڑے کے ساتھ ہلکا سا میک اپ کیا، جس سے ان کے حسن میں بے حد اضافہ ہوگیا۔انسٹاپوسٹ کے کیپشن میں انہوں نے اپنی زندگی سے خوشی اور اطمینان کا اظہار کیا ہے۔
یاد رہے کہ جویریہ عباسی کی پہلی شادی 1997ء میں اداکار شمعون عباسی سے ہوئی تھی، اور ان کی ایک بیٹی، عنزیلہ عباسی ہیں، جن کی شادی انہوں نے گزشتہ سال کی ہے۔
اداکارہ جویریہ عباسی اور شمعون عباسی کی 2009 میں 12 سالہ شادی ختم ہوگئی تھی۔ انہوں نے رواں سال مئی میں اپنی منگنی کا اعلان کیا، جس کے بعد جولائی میں یہ بات بتائی کہ انہوں نے تین ماہ قبل نکاح کر لیا ہے۔
گزشتہ رات اداکارہ نے اپنے نکاح کی تصاویر سوشل میڈیا پر شیئر کیں، جس کے بعد ساتھی فنکاروں اور مداحوں کی جانب سے انہیں مبارک باد دینے کا سلسلہ شروع ہو گیا ہے۔
