اسلام آباد:پاکستان کے سابق فاسٹ بولر وہاب ریاض نے بالی ووڈ اداکارہ کترینہ کیف اور شعیب اختر کی دوستی پر محمد حفیظ کے دلچسپ ردعمل کا ذکر کیا ہے۔
وہاب ریاض نے حال ہی میں جیو نیوز کے پروگرام ’ہنسنا منع ہے‘ میں بطور مہمان شرکت کی، جہاں انہوں نے اپنے نیوزی لینڈ کے دورے کی ایک دلچسپ کہانی بھی سنائی۔
انہوں نے بتایا کہ نیوزی لینڈ کے ایک دورے پر، جب تمام کھلاڑی شعیب اختر کے کمرے میں کھانا کھا رہے تھے، تو وہاں ٹی وی پر کترینہ کیف کا مشہور گانا ’شیلا کی جوانی‘ چل رہا تھا۔
اس موقع پر شعیب اختر نے مسکراتے ہوئے کہا کہ کترینہ کیف کے ساتھ میری بہت اچھی دوستی ہے۔
وہاب ریاض نے کہا کہ شعیب اختر 2008ء میں انڈین پریمیئر لیگ (آئی پی ایل) میں کولکتہ نائٹ رائیڈرز کے لیے کھیل چکے ہیں، جس کی وجہ سے ان کی شاہ رخ خان اور سلمان خان سے دوستی بھی ہے۔
اس دوران ان کی کترینہ کیف سے بھی ملاقات ہوئی، اسی لیے انہوں نے انہیں اپنی دوست قرار دیا۔
وہاب کا کہنا ہے کہ شعیب اختر کی یہ بات سن کر محمد حفیظ حیران رہ گئے اور کھانا کھاتے ہوئے اچانک رک گئے، انہیں اس پر یقین نہیں آرہا تھا۔
جب کسی نے بھی شعیب اختر کی بات پر یقین نہیں کیا تو انہوں نے سب کو کمرے سے باہر نکال دیا اور کہا کہ تم لوگ مجھے جھوٹا سمجھ رہے ہو۔
اُنہوں نے مزید کہا کہ شعیب اختر کے باہر نکالے جانے کے بعد ہم سب نے ریسٹورنٹ جا کر کھانا کھایا۔
