اسلام آباد:پاکستان شوبز انڈسٹری کی معروف اداکارہ ماہرہ خان نے شاہ رخ خان کے ساتھ کام کرتے ہوئے ملنے والی نصیحت کے بارے میں بتا دیا۔
ماہرہ خان نے حال ہی میں سوشل میڈیا ویب سائٹ ایکس پر اپنے مداحوں کے ساتھ سوال و جواب کا ایک سیشن رکھا، جس میں انہوں نے مداحوں کی جانب سے پوچھے گئے سوالات کے دلچسپ جوابات دیے۔
اداکارہ کے ایک بھارتی مداح نے اس سیشن کے دوران سوال کیا کہ آپ نے فلم ’رئیس‘ میں شاہ رخ خان کے ساتھ کام کر کے کیا سیکھا؟
ماہرہ خان نے مداح کے سوال کا جواب دیتے ہوئے کہا کہ زندگی میں خوشیوں کو آنے کا ایک موقع دو۔ ایک اور مداح نے ان سے پوچھا کہ ان کا پسندیدہ ساتھی اداکار یا اداکارہ کون ہے؟
ماہرہ خان نے اس سوال کے جواب میں کہا کہ میرے پسندیدہ ساتھی اداکاروں کی تعداد بہت ہے، لیکن احمد علی اکبر کے ساتھ کام کرنا مجھے خاص طور پر پسند ہے۔
یہ بات قابل ذکر ہے کہ ماہرہ خان نے شاہ رخ خان کے ساتھ بھارتی فلم “رئیس” میں مرکزی کردار نبھایا، جو 2017 میں ریلیز ہوئی تھی۔
