اسلام آباد:معروف میزبان، صحافی، فلم ساز اور بانی پی ٹی آئی کی سابقہ اہلیہ ریحام خان نے پاکستانی چلبلی اداکارہ ہانیہ عامر کو مشورہ دیا ہے کہ وہ شادی نہ کریں۔
ان کا کہنا ہے کہ ہانیہ عامر میری دریافت ہیں، جس پر مجھے بہت فخر ہے۔ انہیں شادی کے بجائے اپنے کیریئر پر توجہ دینے کی ضرورت ہے۔
حال ہی میں ایک پوڈ کاسٹ کے دوران، ریحام خان نے ہانیہ عامر کی کامیابی اور ان کے سفر پر گفتگو کی۔
ایک سوال کا جواب دیتے ہوئے انہوں نے کہا کہ مجھے خوشی ہے کہ فلم جانان میں ہانیہ عامر کا انتخاب میری طرف سے ہوا تھا۔
اس وقت ہانیہ کی عمر صرف 17 سال تھی اور وہ میرے بھانجے کی دوست تھیں، جنہوں نے مجھے ان کا ڈب میش دکھایا جو مجھے بہت پسند آیا۔
ریحام خان کا مزید کہنا ہے کہ بہت جلد ہانیہ بالی ووڈ میں بھی نظر آئیں گی، اور جو میں سوچتی ہوں وہ ہو جاتا ہے۔
ان کا کہنا تھا کہ ہانیہ نے اپنے خاندان کی مدد کے لیے بہت محنت کی ہے، اور اگر وہ شادی کے بجائے اپنے کیریئر پر توجہ دیں تو بہت آگے جائیں گی۔
ریحام خان نے ہانیہ کی میچور ایکٹنگ کی تعریف کی اور کہا کہ ان کے جیسا ٹیلنٹ دبایا نہیں جا سکتا۔ اگر میں نہیں تو کوئی اور ہانیہ کے ٹیلنٹ کو پہچان لیتا۔
واضح رہے کہ ہانیہ عامر نے اپنی اداکاری کا آغاز ریحام خان اور حریم فاروق کی فلم جانان سے کیا تھا۔
