اسلام آباد: وفاقی وزیر برائے ثقافت و قومی ورثہ محمد اورنگزیب کھچی کے دفتر کے باہر ڈائریکٹر محمد بلال کی جانب سے نائب قاصد محمد ابراہیم پر مبینہ طور پر بہیمانہ تشدد کے خلاف وزارت میں شدید احتجاج پھوٹ پڑا۔
ذرائع کے مطابق، تشدد کا واقعہ اس وقت پیش آیا جب محمد ابراہیم سیکریٹری قومی ورثہ اسد گیلانی کے دفتر میں اپنی ڈیوٹی انجام دے رہے تھے۔ واقعے کے بعد وزارت کے ملازمین سراپا احتجاج بن گئے اور قلم چھوڑ ہڑتال کا اعلان کردیا۔
وزارت ثقافت و قومی ورثہ کے افسران اور عملے نے وفاقی وزیر کے دفتر کا بائیکاٹ کرتے ہوئے کوہسار بلاک میں واقع دفتر کی عمارت کو تالے لگا دیے، جبکہ عمارت کی تمام لائٹس بھی بند کردی گئیں۔
ملازمین نے وفاقی وزیر اورنگزیب کھچی سے فوری نوٹس لینے اور تشدد میں ملوث افسر کے خلاف کارروائی کا مطالبہ کیا ہے۔ دوسری جانب وزیراعظم محمد شہباز شریف نے واقعے کا نوٹس لے لیا ہے اور معاملے کی فوری انکوائری کی ہدایت کردی ہے۔
وزارت کے ملازمین کا کہنا ہے کہ جب تک انصاف فراہم نہیں کیا جاتا اور ذمہ دار افسر کے خلاف کارروائی نہیں کی جاتی، احتجاج جاری رہے گا۔
