نیوزڈیسک
اسلام آباد:ڈی جی آئی ایس پی آر لیفٹیننٹ جنرل احمد شریف چوہدری نے معروف برطانوی جریدے “دی اکنامسٹ” کو دیے گئے ایک انٹرویو میں اس تاثر کو یکسر مسترد کر دیا کہ فیلڈ مارشل عاصم منیر کو پاکستان کا صدر بنانے کی کوئی تجویز زیر غور ہے۔
ان کا کہنا تھا کہ ایسی تمام قیاس آرائیاں بے بنیاد اور من گھڑت ہیں۔
بھارتی فوجی کارروائی سے متعلق سوال پر لیفٹیننٹ جنرل احمد شریف نے کہا کہ اگر بھارت نے کوئی جارحیت کی تو اس بار پاکستان کا ردعمل بھارت کے مشرقی علاقوں سے شروع ہوگا، اور حملہ بھارت کے اندر گہرائی تک ہوگا۔
انہوں نے خبردار کیا کہ بھارت کو یہ بات سمجھنی چاہیے کہ وہ ہر جگہ نشانہ بن سکتا ہے۔
یاد رہے کہ سوشل میڈیا پر حالیہ دنوں ایسی افواہیں زیر گردش تھیں کہ صدر آصف علی زرداری کو ہٹا کر فیلڈ مارشل عاصم منیر کو صدر بنایا جا رہا ہے، جس پر وفاقی وزیر داخلہ محسن نقوی نے ردعمل دیتے ہوئے کہا تھا کہ صدر، وزیرِاعظم اور آرمی چیف کو نشانہ بنانے والی منفی مہم کے پیچھے کون ہے، حکومت اس سے واقف ہے۔ انہوں نے واضح کیا کہ صدر کے استعفے یا کسی نئی تقرری کی کوئی بات زیر غور نہیں۔
پیپلز پارٹی پارلیمنٹیرین کے سیکریٹری جنرل نیر بخاری نے بھی ان افواہوں کی سختی سے تردید کی اور کہا کہ صدر آصف زرداری ملک کے آئینی صدر ہیں اور ان کے خلاف پھیلائی جانے والی قیاس آرائیوں میں کوئی حقیقت نہیں۔
ان کا کہنا تھا کہ ایسے بیانات آئین و قانون سے لاعلمی کا ثبوت ہیں، اور بغیر پیپلزپارٹی کی حمایت کے حکومت کا چلنا ممکن نہیں۔
