پاکستان کے جشنِ آزادی کے موقع پر اکثر ایک سوال اٹھایا جاتا ہے:
کیا ایسے حالات میں جشنِ آزادی منانا جائز ہے، جب ملک افراتفری اور مایوسی کی گرفت میں ہے؟ جب غریب دو وقت کی روٹی کو ترس رہا ہے، ملک میں لاقونونیت عام ہے ، انصاف کا فقدان ہے، ریاست قرضوں میں جکڑی ہوئی ہے، آئی ایم ایف کی شرائط پر جھکی ہوئی ہے، خارجہ پالیسی واشنگٹن میں لکھی جاتی ہے، اور اندرونِ ملک میں سیاسی دشمنیاں
عروج پر ہیں؟
یہ سوال واقعی اہم ہے، اور اس کا جواب بھی اتنا ہی بامعنی۔
اس کا سادہ جواب یہ ہے کہ “آزادی” کسی حکومت کی کامیاب یا ناکام پالیسی کا نام نہیں۔ آزادی ایک بنیادی انسانی حق ہے۔
ہر انسان فطری طور پر خواہش رکھتا ہے کہ اپنی زندگی کے فیصلے — خواہ وہ انفرادی ہوں یا اجتماعی، سیاسی ہوں یا معاشی، داخلی ہوں یا خارجی — اپنی سوچ، سمجھ اور صلاحیت کے مطابق خود کرے۔ یہ خواہش اس بات سے قطع نظر ہوتی ہے کہ وہ شخص حقیقتاً ان فیصلوں کو نافذ کر پاتا ہے یا نہیں-
ایک سچا واقعہ:
میرے ایک دوست اور ان کی بیوی، جو پہلے اپنے بھائی، بھابھی اور ان کے بچوں کے ساتھ ایک شاندار گھر میں بظاہر خوش و خرم زندگی گزار رہے تھے، کچھ عرصے بعد محنت سے پیسے جمع کر کے ایک چھوٹا سا گھر خرید لیا۔ گھر خریدتے ہی انہوں نے دوستوں کو مدعو کیا۔
جب میں نے پوچھا کہ اتنے آرام دہ ماحول سے نکل کر قرض لے کر ایک چھوٹے سے مکان کی ضرورت کیوں پیش آئی؟
تو بھابھی نے محبت سے مسکرا کر کہا:
“یہ سچ ہے کہ ہم وہاں سکون سے رہ رہے تھے، لیکن وہ گھر ہمارا نہیں تھا۔ یہ گھر، چاہے چھوٹا ہی سہی، ہمارا اپنا ہے۔ آج آپ سب ہمارے اپنے گھر آئے ہیں۔”
یہ کہہ کر وہ خاموش ہو گئیں، لیکن ان کے چہرے کی مسکراہٹ سب کچھ کہہ گئی۔
ملک کی آزادی بھی کچھ اسی طرح کا تصور ہے۔
اس لیے ہمارا جشنِ آزادی منانا، کسی ناکام سیاست، معاشی بدحالی یا انصاف کی کمی کی پذیرائی نہیں، بلکہ آزادی کے اُس جذبے کا جشن ہے جو ہر انسان کا حق ہے، جو ہم نے بڑی قربانیوں سے حاصل کیا، اور جو ہم سب کا اجتماعی ورثہ ہے۔
یہی وہ تصور ہے جس نے فلسطین اور کشمیر کے عوام کو بے پناہ مظالم کے باوجود آزادی کی جدوجہد پر قائم رکھا ہوا ہے۔
لہٰذا، جشنِ آزادی ضرور منائیں — یہ اس تصور کو زندہ رکھنے کا دن ہے، جو ہمیں غلامی سے نکال کر خود مختاری کی طرف لایا، چاہے سفر ابھی باقی ہو۔
جشنِ آزادی مبارک!
پاکستان زندہ باد!
پاکستانی قوم پائندہ باد
