نیوز ڈیسک
خیبرپختونخوا کے ضلع ڈیرہ اسماعیل خان کے علاقے درازندہ میں دھماکے کے متاثرین کو اسپتال منتقل کرنے والی ریسکیو 1122 کی ایمبولینس پر فائرنگ کے نتیجے میں 2 ریسکیو اہلکار شہید جبکہ ایک زخمی ہوگیا۔
سیکیورٹی ذرائع کے مطابق درازندہ کے علاقے امن میلہ میں قائم چیک پوسٹ پر دھماکے کے بعد ریسکیو ٹیمیں امدادی کارروائیوں میں مصروف تھیں اور زخمیوں کو اسپتال منتقل کیا جا رہا تھا کہ ایمبولینس کو فائرنگ کا نشانہ بنایا گیا۔
ریسکیو 1122 کے مطابق فائرنگ کے نتیجے میں امتیاز اور شریف نامی 2 اہلکار شہید ہوئے، جبکہ انیس نامی اہلکار زخمی ہوا، جسے طبی امداد کے لیے اسپتال منتقل کردیا گیا۔
اس سے قبل درازندہ میں امن میلہ کے قریب قائم مشترکہ چیک پوسٹ کو دھماکے میں نشانہ بنایا گیا تھا۔ مختلف رپورٹس کے مطابق دھماکے میں خواتین اور ایک بچے سمیت متعدد افراد جاں بحق جبکہ 35 افراد زخمی ہوئے، جنہیں مختلف اسپتالوں میں منتقل کیا گیا۔
دھماکے کے بعد ریسکیو اہلکار زخمیوں اور جاں بحق افراد کو جائے وقوعہ سے منتقل کرنے میں مصروف تھے کہ اسی دوران ایمبولینس پر فائرنگ کا واقعہ پیش آیا۔
سرکاری ذرائع نے ایمبولینس پر فائرنگ کے واقعے کا الزام فتنہ الخوارج پر عائد کیا ہے۔ واقعے کے بعد سیکیورٹی فورسز نے علاقے میں کارروائی شروع کردی ہے جبکہ سرچ آپریشن بھی جاری ہے۔
خیبرپختونخوا حکومت نے ریسکیو اہلکاروں کی شہادت پر افسوس اور واقعے کی مذمت کرتے ہوئے کہا ہے کہ اہلکاروں نے ڈیوٹی کے دوران جانوں کا نذرانہ پیش کیا۔
حکومت کے مطابق قانون نافذ کرنے والے ادارے عوام کے تحفظ اور امدادی سرگرمیوں میں مصروف ہیں، جبکہ دہشت گردی سے متاثرہ شہریوں کو امداد اور تحفظ فراہم کرنا حکومت اور متعلقہ اداروں کی ذمہ داری ہے۔
حکومتی مؤقف کے مطابق واقعے کے ذمہ دار عناصر کے خلاف کارروائی جاری ہے۔
