نیوز ڈیسک
لاہور کے علاقے ڈیفنس سی میں آذربائیجان سے تعلق رکھنے والی 20 سالہ غیر ملکی خاتون نے مبینہ اجتماعی زیادتی کا الزام عائد کیا ہے، جس پر پولیس نے مقدمہ درج کرکے تحقیقات شروع کردی ہیں۔
پولیس کے مطابق خاتون چند روز قبل لاہور پہنچی تھیں۔ پولیس کو دی گئی شکایت میں خاتون نے الزام لگایا کہ دو نامعلوم خواتین انہیں ایک کیفے میں لے گئیں، جہاں پہلے سے 3 مرد موجود تھے۔
خاتون کے مطابق کیفے میں کچھ وقت گزارنے کے بعد مذکورہ افراد انہیں ایک فلیٹ میں لے گئے، جہاں مبینہ طور پر انہیں کوئی نشہ آور چیز پلائی گئی۔
شکایت کے مطابق نشہ آور چیز پلانے کے بعد 3 افراد نے مبینہ طور پر خاتون کو اجتماعی زیادتی کا نشانہ بنایا۔
پولیس کا کہنا ہے کہ واقعے کے بعد ملزمان خاتون کو ایئرپورٹ کے قریب چھوڑ کر فرار ہوگئے۔
پولیس نے خاتون کی شکایت پر مقدمہ درج کرلیا ہے جبکہ واقعے میں مبینہ طور پر ملوث افراد کی تلاش شروع کردی گئی ہے۔
حکام کے مطابق تفتیش کے دوران مختلف شواہد اکٹھے کیے جا رہے ہیں اور ملزمان کی شناخت سمیت واقعے کے تمام پہلوؤں کا جائزہ لیا جا رہا ہے۔
پولیس کا کہنا ہے کہ تحقیقات مکمل ہونے کے بعد واقعے سے متعلق مزید حقائق سامنے آئیں گے۔
