نیوز ڈیسک
پاکستانی سوشل میڈیا کے معروف کریئیٹرز ڈکی بھائی اور عروب جتوئی ایک بار پھر سوشل میڈیا صارفین کی توجہ کا مرکز بن گئے، تاہم اس بار بحث کی وجہ عروب جتوئی کا ایک منی وی لاگ ہے، جس میں انہوں نے ایک ہی دن میں ایک کروڑ روپے خرچ کرنے کا چیلنج دکھایا۔
عروب جتوئی کی جانب سے شیئر کیے گئے منی وی لاگ میں انہیں مختلف مہنگی اشیا خریدتے اور ایک دن کے اندر مقررہ رقم خرچ کرنے کی کوشش کرتے دیکھا جا سکتا ہے۔
ویڈیو کے آغاز میں عروب جتوئی نے بتایا کہ انہوں نے ایک دن میں ایک کروڑ روپے خرچ کرنے کا فیصلہ کیا ہے اور دیکھنا ہے کہ یہ دن کس طرح گزرتا ہے۔
چیلنج کے دوران عروب جتوئی اور ڈکی بھائی پہلے ایک مہنگے ریسٹورنٹ گئے، جہاں مختلف کھانے منگوائے گئے۔ عروب جتوئی کے مطابق کھانے کا بل تقریباً 50 ہزار روپے آیا۔
اس کے بعد ڈکی بھائی نے گاڑی خریدنے کی تجویز دی، تاہم عروب جتوئی نے اس وقت گاڑی خریدنے سے انکار کرتے ہوئے کہا کہ یہ مناسب فیصلہ نہیں ہوگا۔ اس کے بجائے انہوں نے نیا آئی فون خریدنے کا فیصلہ کیا، جس کی قیمت انہوں نے تقریباً 10 لاکھ روپے بتائی۔
چیلنج کے اگلے مرحلے میں عروب جتوئی زیورات کی خریداری کے لیے جیولری اسٹور پہنچیں، جہاں انہوں نے سونے کے مختلف سیٹ اور چوڑیاں خریدیں۔ ان کا کہنا تھا کہ سونا ان کے خیال میں ایک اچھی سرمایہ کاری ہے۔
عروب جتوئی کے مطابق زیورات کی خریداری پر چیلنج کے بجٹ کا بڑا حصہ خرچ ہوگیا۔ انہوں نے یہ بھی بتایا کہ انہیں خریداری پر ڈسکاؤنٹ دیا گیا، جبکہ جیولرز کی جانب سے سونے کا ایک سیٹ تحفے میں بھی دیا گیا۔
ویڈیو سوشل میڈیا پر سامنے آنے کے بعد صارفین کی جانب سے مختلف ردعمل سامنے آئے۔ بعض صارفین نے ایک ہی دن میں ایک کروڑ روپے خرچ کرنے پر حیرت کا اظہار کیا، جبکہ کچھ نے اتنی بڑی رقم کے اخراجات کو سوشل میڈیا پر دکھانے پر سوالات اٹھائے۔
کچھ صارفین نے اپنے تبصروں میں حالیہ ایف آئی اے معاملے کا بھی حوالہ دیا، جبکہ بعض کا کہنا تھا کہ انہیں ڈکی بھائی اور عروب جتوئی کی اپنی کمائی خرچ کرنے پر اعتراض نہیں، تاہم اتنی بڑی رقم کے اخراجات کو سوشل میڈیا پر نمایاں کرنا انہیں مناسب نہیں لگتا۔
بعض صارفین نے یہ سوال بھی اٹھایا کہ ایسے وقت میں جب بہت سے لوگ اپنی بنیادی ضروریات پوری کرنے کے لیے مشکلات کا سامنا کر رہے ہیں، مہنگی شاپنگ اور بھاری اخراجات کی ایسی ویڈیوز عام صارفین پر کیا اثر ڈالتی ہیں۔
تاہم، کچھ صارفین نے اس تنقید سے اختلاف کرتے ہوئے کہا کہ لوگ اپنی مرضی سے ایسی ویڈیوز دیکھتے ہیں اور کریئیٹرز کو ویوز اور آمدنی بھی حاصل ہوتی ہے، اس لیے کسی کو ویڈیو پسند نہ ہو تو اسے نظر انداز کیا جا سکتا ہے۔
یوں عروب جتوئی کی ایک کروڑ روپے ایک دن میں خرچ کرنے کی ویڈیو نے سوشل میڈیا پر اخراجات، دولت کی نمائش اور کانٹینٹ کریئیشن کے حوالے سے ایک نئی بحث چھیڑ دی ہے۔
