نیوزڈیسک
اسلام آباد:سعودی عرب کے قومی دن کو پاکستان میں بھرپور انداز سے منانے کی تیاریاں عروج پر پہنچ گئیں۔
وفاقی دارالحکومت اسلام آباد سبز روشنیوں میں نہا گیا، جہاں اہم عمارتوں اور شاہراہوں کو دلکش انداز میں سجایا گیا۔
شاہراہ دستور، سری نگر ہائی وے، قائداعظم ایونیو اور فیصل ایونیو پر لگائی گئی سبز لائٹوں نے شہر کا حسن دوبالا کر دیا۔
اس موقع پر شاہراہ دستور اور سری نگر ہائی وے پر وزیراعظم پاکستان، سعودی فرمانروا شاہ سلمان، ولی عہد محمد بن سلمان اور آرمی چیف جنرل عاصم منیر کی تصاویر والے سٹیمرز بھی آویزاں کیے گئے، جبکہ ڈی چوک پر بڑی ہورڈنگز نصب کی گئیں۔
کراچی میں پریس کلب چورنگی پر بھی سعودی قومی دن کی مناسبت سے خصوصی تقریب منعقد ہوئی، جس میں نائب قونصل جنرل سعودی عرب عبدالرحمان جمعہ نے کہا کہ پاکستان میں قومی دن کا جوش و خروش دیکھ کر خوشی ہوئی۔
انہوں نے مزید کہا کہ پاکستان اور سعودی عرب کے درمیان دفاعی معاہدے نے دونوں ممالک کے تعلقات کو نئی مضبوطی دی ہے۔
تقریب میں گورنر سندھ کامران ٹیسوری اور ان کے صاحبزادے زید خان ٹیسوری کا شکریہ ادا کیا گیا، قومی ترانہ بجایا گیا، جبکہ چراغاں اور آتشبازی نے ماحول کو مزید پُررونق بنا دیا۔
وزیراعلیٰ پنجاب مریم نواز نے اپنے پیغام میں سعودی قیادت اور عوام کو مبارکباد دیتے ہوئے کہا کہ سعودی عرب صرف پاکستان کا دوست نہیں بلکہ ہر مسلمان کے لیے عقیدت کا مرکز ہے۔
انہوں نے کہا کہ پاکستان دفاعی معاہدے کے بعد محافظِ الحرمین الشریفین کے شانہ بشانہ کھڑا ہے۔
مریم نواز نے مشکل وقت میں پاکستان کا ساتھ دینے پر سعودی قیادت کا شکریہ ادا کیا اور کہا کہ دونوں ملکوں کے تعلقات امت مسلمہ کے لیے ڈھال ہیں۔ انہوں نے سعودی عرب میں امن، خوشحالی اور ترقی کی دعا بھی کی۔
