نیوزڈیسک
اسلام آباد: امریکی صدر ڈونلڈ ٹرمپ برطانیہ کے دو روزہ سرکاری دورے کے بعد وطن واپس روانہ ہوگئے۔
روانگی سے قبل ایئر فورس ون میں میڈیا سے گفتگو کرتے ہوئے انہوں نے لندن کے میئر صادق خان کو شدید تنقید کا نشانہ بنایا۔
ٹرمپ نے کہا کہ انہوں نے برطانوی حکام سے استدعا کی تھی کہ گزشتہ رات ونزر کاسل میں ہونے والی شاہی ضیافت (اسٹیٹ بینکوئٹ) میں صادق خان کو مدعو نہ کیا جائے کیونکہ وہ انہیں طویل عرصے سے پسند نہیں کرتے۔
انہوں نے دعویٰ کیا کہ صادق خان اس ضیافت میں شریک ہونا چاہتے تھے لیکن ان کی درخواست پر خان کو مدعو نہیں کیا گیا۔
امریکی صدر نے صادق خان کو دنیا کے بدترین میئرز میں شمار کرتے ہوئے کہا کہ لندن میں جرائم کی صورتحال انتہائی خراب ہے اور صادق خان اس حوالے سے ناکام ثابت ہوئے ہیں۔
انہوں نے خان کو امیگریشن پالیسیز کے حوالے سے بھی ایک “آفت” قرار دیا۔
یاد رہے کہ ڈونلڈ ٹرمپ نے برطانیہ کے ساتھ ٹیکنالوجی شراکت داری کے معاہدے پر دستخط کیے اور ان کے اعزاز میں شاہی خاندان نے ونزر کاسل میں ضیافت بھی دی، جس میں شاہی خاندان کے ارکان، برطانوی سیاستدان اور امریکی ٹیکنالوجی کمپنیوں کے سربراہان شریک ہوئے۔
