نیوزڈیسک
اسلام آباد: وزیراعظم شہباز شریف نے سہ ملکی سفارتی دورے کا آغاز کر دیا ہے، جس کا پہلا مرحلہ سعودی عرب ہے۔
وہ اسلام آباد سے ریاض روانہ ہوئے جہاں انہیں سعودی ولی عہد محمد بن سلمان کی دعوت پر اہم ملاقاتیں کرنی ہیں۔
دورے کے دوران وزیراعظم سعودی ولی عہد سے ملاقات کریں گے اور پاک سعودی تعلقات کے تمام پہلوؤں کا جائزہ لیں گے۔
ترجمان دفتر خارجہ کے مطابق ملاقات میں دونوں رہنما علاقائی اور عالمی امور پر تبادلہ خیال کریں گے۔
شہبازشریف کے اس دورے سے دو طرفہ شراکت داری مزید مستحکم ہوگی اور عوام کے مفاد میں تعاون کے نئے مواقع تلاش ہوں گے۔
سعودی عرب کے دورے کے بعد وزیراعظم شہباز شریف برطانیہ کے دو روزہ دورے پر جائیں گے، اور اس کے بعد امریکا کا دورہ کریں گے۔
امریکا میں وہ چھبیس ستمبر کو اقوام متحدہ کی جنرل اسمبلی سے خطاب کریں گے اور بائیس ستمبر کو فلسطین کے دو ریاستی حل کے بارے میں اعلیٰ سطحی کانفرنس میں شرکت متوقع ہے۔
شہبازشریف کے ہمراہ نائب وزیراعظم و وزیر خارجہ اسحاق ڈار، وزیر دفاع خواجہ محمد آصف، وزیر خزانہ محمد اورنگزیب، وزیر اطلاعات و نشریات عطا اللہ تارڑ، وفاقی وزیر ماحولیات مصدق ملک اور معاون خصوصی طارق فاطمی بھی ہیں۔
